「治癒系創作歌手」Moon Tang以《房屋供應問題》回應感情狀況 望保持初心：希望我永遠都只係緊張音樂

有「樂壇小精靈」之稱嘅治癒系創作歌手Moon Tang鄧凱文上年以新人身份出道後，今年亦接連推出三首新歌。新歌《房屋供應問題》更加獲得著名填詞人黃偉文Wyman加持，以貼地嘅香港房屋問題帶出戀人間嘅問題，引嚟唔少人關注。作為出道一年嘅新年，Moon就直言對頒獎禮獲獎並冇信心，反而最希望自己可以保持創作人嘅「初心」，謹記自己係個「專注做音樂嘅女仔」。

變全職歌手直言限制增加：想保持只係一個做音樂嘅女仔

Moon喺大學時期本來係修讀設計，之後亦曾經擔任Art Director助手等幕後工作，本來都想向拍攝工作嘅方法進發。後來機緣巧合下Moon去到丹麥交流，人生路不熟又冇熟悉嘅朋友，單單靠一支結他就開始創作之路，由初期自資出歌，去到慢慢被更多聽眾發現同留意，後來更加被唱片公司發掘入行。入行一年多，Moon就直言心態上都有改變：「唔同咗個位係創作同做音樂唔再係返完學或者做完其他嘢嘅自娛活動，即係以前未做全職嘅時候呢啲嘢對我嚟講係一個Escape，係我唔想做我本身要做嘅嘢就會去咗唱歌寫歌，但係宜家就變咗每一日一起身就要創作同唱歌，呢樣嘢都用咗一段時間去Adjust，由興趣變咗做每一日可以做你鍾意做嘅嘢。」

Moon亦都直言全職歌手嘅身份都會多咗限制：「多咗好多唔關音樂事嘅嘢要顧慮，但係我都仍然好努力想保持我只係一個做音樂嘅女仔！」幸運嘅係修讀設計亦都為Moon帶咗唔少嘅助力，令佢知道一個唔同嘅視覺去睇呢個世界，亦都對藝人嘅形象、MV設計等等都有一套睇法，佢亦都希望嚟緊可以投放更多自己嘅想法喺作品上。

前輩教路寫低創作原因 賦予作品不同意義

Moon出道以嚟都被歌迷譽為「治癒系歌手」嘅，皆因佢嘅作品都有種魔力，可以引起樂迷共鳴同治癒樂迷。Moon就提到推出第一隻EP「Dear Moon」嘅時候有前輩教路：「你諗清楚你出嘅原因係咩，寫低佢，因為係你做嘅過程會遇到好多困難，或者你會遇到要決定一啲重要嘢嘅位，你就要諗返嗰個原因，你先可以繼續行落去，嗰陣時的確係寫咗希望呢啲歌可以療癒到呢個世界聽到嘅人，嗰陣時真係冇諗過真係會有人聽，但係出完之後收到好多唔同嘅故事同經歷，呢啲係我覺得做音樂最開心嘅事，可以聽到唔同嘅人點樣去Interpet我啲歌。」

喺一眾嘅聽眾DM同留言，Moon就分享咗一個最深刻嘅留言：「之前出過首歌係叫《I Love U》，聽落未必一聽就好療癒，但係當時就有一對結婚十年嘅夫妻DM我，佢哋話聽到啲詞十分理解，覺得首歌講嗰種矛盾同Confuse佢哋好Relate到，聽完就覺得舒服咗。」雖然收到唔少DM，不過Moon其實更加希望收到樂迷來信，可以知道樂迷嘅名，亦都可以隨時睇返，亦都承諾有時間會回信俾Fans，希望建立更加Close，更加似朋友嘅關係。

以《房屋供應問題》回應自身狀況 聞言「世紀宣傳計劃」 ：咁大鑊

提到今次推出新歌《房屋供應問題》，講述戀人間嘅問題，咁啱亦都貼合Moon啱啱分手狀況。不過Moon就透露其實當時Wyman填詞嘅時候唯一知道嘅係當下Moon已經分手，其餘都係全靠Wyman嘅功力，為Moon帶嚟呢首可愛得嚟又貼地嘅作品，而Moon亦都借歌曲回應現時狀況：「聽落都好開心就知我哋兩個對呢件事都輕鬆嘅。」

呢首歌除咗貼地嘅歌詞，另一個令到唔少人關注嘅係佢嘅「世紀宣傳計劃」，提供一年免租單位。Moon就將呢個宣傳計劃歸功Marketing team，仲話自己都好驚訝：「我完全冇諗過，原本其他Plan係去吓其他人屋企到住，好似之前去咗Borris到住，或者有其他計劃都覺得好好，然後有一日佢哋突然同我講咗呢個計劃，我就好Shock，覺得咁『大鑊』，但係都好開心發生咗。」Moon亦都分享咗唔少睇到嘅Comment，有好似拍拖多年未試過一齊住、「香港版Long D」、類似歌詞入面嘅情侶被另一半嫌棄想藉此分開等等，不過名額就始終得一個，Moon亦都直言好難揀，唯有希望大家都可以盡量解決問題：「抽到開心，抽唔到都好好努力解決問題。」

直言冇信心攞獎望保持初心 最大夢想開幼稚園

臨近年尾頒獎禮旺角，唔少歌手都發力拉票同衝刺，不過Moon就直言自己冇乜信心，認為有比自己更加攞獎嘅歌詞；而佢希望做到嘅係可以一直保持初心，專心創作：「我希望我永遠都只係緊張音樂，攞獎從來對創作係冇幫助，攞獎只係Bonus。」而Moon亦都透露專心為下年出歌做準備，已經有唔少以感情為題嘅作品，大多亦都係來自自己同身邊朋友嘅故事，有分手嘅傷心故事，亦都有結婚嘅甜蜜事。

被問到2024有冇咩目標，Moon就表示其實一年時間太短，唯一希望可以不斷做唔好停落嚟，再出多啲歌，等自己更有能力演出，甚至係去外地Tour，可能短期去東南亞，再遠啲可以去歐洲演出。至於長遠嘅夢想，「樂壇小精靈」Moon就話係想開間幼稚園，因為鍾意小朋友之餘亦都知道教育嘅重要，希望小朋友可以有多啲不一樣嘅教育，例如野外求生技能同美感教學；或者呢啲咁有童真嘅夢想同諗法，就係其中一個令到Moon被封為「樂壇小精靈」，作品擁有治癒樂迷嘅原因。