「足球女神」潘杰寧IG自爆已離婚 坦言浴火重生︰現在的我是自在快樂的

被網民稱為「杰寧公主」嘅潘杰寧，舊年世界盃ViuTV搵佢主持《90分鐘狂熱倒數》講波經，因為係球迷一名兼且做過主持多年，熟書之餘又有口才，令唔少觀眾欣賞。

向來被稱為幸福人妻嘅「杰寧公主」，尋晚突然自爆已經離婚一段時間！潘杰寧喺IG出post交代，話自己一直搵最佳時機講離婚呢件事，而近半年都被問及婚姻，「大家都感覺我是一位幸福人妻。但事實卻是，我已結束了婚姻生活有一段時間。」

潘杰寧直言要離婚要處理法律手續之外，更需要處理情緒。

潘杰寧2020年同拍拖多年男友結婚，但佢而家已經將當時嘅婚姻生活照全部剷走。一副童顏嘅杰寧公主原來已經37歲，2007年佢參加有線嘅《我要成名》比賽而入行，後來加入有線主持《活得很滋味》，又因為係球迷而被派去主持足球節目。2011年潘杰寧離開有線，曾經成為OL，又去過英國working holiday，之後以自由身再次參與幕前工作。

杰寧公主除咗做主持之外，仲係一名心理輔導師及心理學學士課程客席講師，當年高考佢拎住優異成績考入港大社會科學院，主修心理學。早幾年佢重返港大讀碩士，到2021年正式畢業。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！