【多圖】姜濤演唱會｜狀態大勇落力跳 經歷浪濤坦言曾經係Dummy 林海峰驚喜現身重演叱咤頒我最喜愛男歌手

【Yahoo 娛樂圈直擊報道】MIRROR 成員姜濤由周三（2日）晚起一連四日舉行 Solo 演唱會，一眾歌迷引頸以待。今次演唱會以「Waves」為主題，舞台運用咗布營造浪濤流動，場面十分壯觀。姜濤以新歌《濤》為個唱開場，帶來如瀑布和浪濤一樣嘅氣勢，強勁節拍讓觀眾感受到表演力量！緊接仲有《作品的說話》及《Master Class》。之後姜濤亦發表感言，指今年不論個人定團隊都經歷咗好多浪濤，希望自己可以好似水一樣有數不盡嘅形態，用咁嘅形態心態去接受所有批評。

之後，佢亦都演唱多數佢嘅作品，包括《亞特蘭提斯》、《鏡中鏡》等等，喺唱到「第11胎」《DUMMY》嘅時候，姜濤就提到呢首歌對佢嘅意義，就係提醒自己「不論成功又好，失敗又好，都要保持謙卑。無論行到邊一度，我都記得自己曾經係一個Dummy」。喺今年 1 月 1 日「叱咤頒獎禮」上，姜濤演出《鏡中鏡》時忘我跪地演唱，惹來唔少抨擊，之後佢就推出咗帶有暗黑風格同自嘲意味嘅《DUMMY》。相信姜濤喺演唱會上唱番呢兩首歌都有感觸，經歷過才能「自訂存在意義」。

翻唱鄧麗君黎明作品 讓年輕人認識

姜濤喺揀歌上亦花盡心思，翻唱多首前輩作品，包括鄧麗君嘅《我只在乎你》。佢話：「覺得作為年輕歌手，有責任令更多年輕一輩知道，香港同華語樂壇有好多好嘅前輩，佢哋嘅作品同精神，希望呢啲歌令你哋有更多認識。」佢仲話細個嗰陣姜媽經常播《我只在乎你》，「今日我唱俾你聽」，讓台下姜媽同一眾姜糖冧爆。另外，姜濤亦翻唱黎明嘅《我的親愛》，同全場觀眾一齊唱「Sayonara o Sayonara o」，帶動開心氣氛！

夥肥仔跳唱《特務肥姜》 林海峰將氣氛炒熱

嘉賓方面，頭場演唱會姜濤就請嚟師傅 Fatboy@ERROR，兩人一齊合作演繹《特務肥姜 2.0》舞台，二人合拍大騷舞技。而第二位嘉賓就係喺「叱咤頒獎禮」頒發「我最喜愛的男歌手」獎俾姜濤嘅林海峰，林海峰仲搞笑話自己攞獎都未試過咁多人留言，勉勵姜濤繼續努力，等佢都可以繼續成為「我最喜愛男歌手嘅我最喜愛頒獎嘉賓」。

林海峰大讚一眾姜糖先係「用作品說話」，不斷支持偶像代言產品，「你哋買咗幾多支牙刷呀？買咗幾多支啤酒呀？買咗幾多份保險呀？買咗幾多分 Body Check 呀？」佢話 Fans 瞓身以行動支持姜濤係真正用作品說話，要頒獎肯定。

林海峰亦喺台上亦爆出連串金句，例如提及每次姜濤去商台接受訪問，外面都有大批 Fans 等候，「30幾度百幾人（姜糖）！都冇人暈低！所以你（姜濤）都唔可以暈低」。林海峰仲話：「我應承大家，我會努力頒獎比佢！」、「我作為前輩，會繼續努力孝敬後輩」等等，更加重演頒獎一刻，不過就係由姜濤頒「我最喜愛男歌手嘅我最喜愛頒獎嘉賓」俾佢。觀眾持續笑足 5 分鐘。

化身姜糖凌晨去銅鑼灣舉燈牌

感激 Fans 支持：你哋係我屋企人！

演唱會中段，當姜濤唱完《追》後，大會播放一條絕密片段！過去姜糖經常在銅鑼灣舉行大型應援活動，片段就紀錄咗姜濤曾經喺凌晨3點半去到銅鑼灣崇光百貨對出，化身姜糖咁舉起燈牌應援20分鐘！片入面佢舉起「姜」字燈牌，但無幾耐就手臂酸痛，仲大叫：「好憎姜濤呀！」漆黑中間中有車行過，但冇人認得出姜濤。完成任務之後，佢深深體會到姜糖平時應援有幾辛苦，播完片之後佢再一次登上舞台，佢好感動咁同一眾 Fans 講：「你哋係我屋企人！」佢感激姜糖一路支持，仲喺演唱會上唱出新歌《好得太過份》，讚姜糖們真係「好得太過份」。

歌單

1. 《濤》

2. 《作品的說話》

3. 《Master Class》

4. 《我只在乎你》（原唱：鄧麗君）

5. 《風兩不改》

6. 《亞特蘭提斯》

7. 《心牆》（原唱：郭靜）

8. 《鏡中鏡》

9. 《DUMMY》

10. 《特務肥姜 2.0》

11. 《孤獨病》

12. 《追》

13. 《好得太過份》

14. 《一號種籽》

15. 《Every Single Time》

16. 《我的親愛》（原唱：黎明）

17. 《一秒間》
    —ENCORE—

18. 《愛情簽證申請》

19. 《我多喜歡你，你會知道》（原唱：王俊琪）

20. 《蒙著嘴說愛你》

嘉賓

Fatboy@ERROR

林海峰

日期：2023 年 8 月 2 - 5 日

時間：8：15 pm

地點：亞洲國際博覽館 Arena

票價：$1,080 / $880 / $580

主辦及經理人公司：MakerVille

協辦：MOOV

冠名贊助：FWD 富衛保險 10 周年 x HKT

大會指定虛擬銀行：Mox