【Yahoo娛樂圈直擊】一連16場 MIRROR演唱會「MIRROR FEEL THE PASSION CONCERT TOUR 2024 · HONG KONG」演唱會周六（3 日）尾場。其中Stanley（邱士縉）與Jeremy（李駿傑）合作《Fever》，fit 爆身形連日成為熱話，到尾場更「終極一脫」，由 dancer 褪去上衣，大騷八舊腹肌和健碩胸肌，惹全場鏡粉瘋狂尖叫，高呼 Stanley 是「大表波」。
「肌肉擔當」Stanley 演唱會中與Jeremy 的 crossover，原本身穿黑色外套，爆肌身形即備受注目，每晚震撼觀眾眼球，到最後一晚更是火力全開，表演中途由 dancer 褪去 Stanley 外套，完美身形外露，全場尖叫連連，氣氛推至高點。
尾場 12 子都顯得不捨，多次提到「最後一場喇！」12 子緊接 Jer《人類群星閃耀時》後出場，以一身全白打扮唱出《We All Are》時全場大合唱，氣氛非常溫馨，Ian、Jeremy、Alton 和 Jer 都有眼濕濕想喊，現場鏡粉紛紛大叫「唔好喊」！
演唱會尾聲，隊長 Lokman感性道，「做呢個 show 好唔容易，每晚行返落台，身水身汗，問自己咁辛苦點解，但轉頭上台見返你哋，力量就唔知點解出咗來。好多嘢都唔容易，但只要行出第一步，消化、接受、改變，好多嘢就會變得好易。」
尾場歌單大致無變動，惟其中一次 encore 部分，Mirror 選擇唱出《We are 》和出道單曲《一秒間》，另鏡粉十分驚喜。另外，演唱會上公布了全新英文單曲teaser，歌曲名稱為《Day0》，寓意在演唱會後會以嶄新面貌重新出發，新歌更將驚喜與美國 rapper Dame D.O.L.L.A，即 NBA 現役球星 Damian Lillard 合作。
Jer 在唱出《Dear Children》前，罕有提到創作這首歌的初衷，源於去年感到，城市中很多人不開心，「我生活在這城市，共同呼吸，感受到身邊唔開心的朋友好多，好想做一首歌鼓勵大家，同大家講，當寂寞，或生活、愛情、學業唔如意都好，身邊會有人一齊行，唔係自己一個。點解首歌叫 children，因為小朋友的童真、真摯、不怕犯錯的特質，是很值得大家去保留。」
雅虎香港新聞 