【年少無知】性格坦率未必人人受 千嬅被老公嘲在娛樂圈能生存是大命

楊千嬅和老公丁子高兩公婆去年在工作上組成合作夥伴，老公成為太太經理人拍檔搵錢，近日又夫妻檔拍攝理財廣告吸金，化上老妝預演同諧到老的畫面，令兩人有深刻體會，更雙雙落淚。

自認心急的千嬅，揚言絕非精明投資者，欠缺老公一份冷靜的頭腦和觀察性，更不能成為家中的財政大臣，千嬅笑說：「好大鑊，叫我計數冇樣啱數，概念唔好，一直以來媽咪幫我管理，有家庭後要自己負責，唔太複雜嘅嘢，例如小朋友起居飲食就OK。」已為人母的千嬅又說，希望兒子有正確的價值觀，去年開始幫兒子Torres開戶口儲利是錢。

今年歌影視都會見到千嬅蹤影，三月底開始實踐巡演夢想，亦是自組公司後最大的一個項目，她要做好體能訓練之餘，更要將廣東歌音樂文化推廣出去，但巡迴要花上更長時間，千嬅未能每日陪伴兒子，所以平日都會爭取親子時間，她說：「Torres返學有固定時間，冇早兩年咁黐身，以前佢會唔開心，而家會講說話，會寫字條放喺門口。」除此，千嬅還說：「生完仔我覺得成個人生變咗，由日夜顛倒到而家七點幾起身，因為個仔會拍門入嚟，覺得每日可以穩定食個早餐或者晚飯，已經可以溝通好多，盡量早晚想見到阿仔，等佢有家庭觀念。」

兒子Torres漸長，明白媽媽要工作，但亦會有大眾小孩一樣的想法，千嬅說：「佢會覺得每個媽媽都會喺屋企整個飯盒畀小朋友，點解你永遠都冇為我做一個餸？我有整過壽司，但佢想要煮飯嗰種，有日我親自下廚煮鮮茄蛋牛肉飯，佢第一時間擺落口，但個樣好怪，我話『做咩？好唔好食？』佢冇咩表情，食食下話『媽咪我飽，食唔落』，後來從姐姐口中得知，佢話點解好似甜品味道，因為牛肉要落糖，我多手又想健康，所以落咗冰糖，成嚿石頭咁放落去，好似蕃茄糖水咁，梗係怪啦。」

講到和老公拍住搵錢，千嬅認為有利有弊，勝在溝通可以更直接，但意見分歧少不免，千嬅說：「講到底覺得易解決係因為佢係我嘅親人，我先生做開公關巿場，佢會從客戶角度解釋畀我聽，以前我冇聽過，又唔想知，佢會同我講你有要求唔緊要，但要配合到個客，有時有啲嘢係要妥協，妥協唔係要你核突同低水平，而係巿場角度人哋冇錢賺，點解仲要贊助你呢？以前啲經理人唔會講呢啲。」如今千嬅會聽從老公意見，變得協調，並激讚說：「呢方面我先生增進我好多知識，尤其是工作耐性，會諗人哋多啲，藝人通常好自我為中心，諗自己先。」

千嬅爆老公最愛深夜睡覺時講心事，兩人枕邊語成為良好溝通，過往面對經理人從未如此坦白，自知予人感覺唔「惹小」，坦率性格未必人人接受，千嬅說：「由我開始管理自己人生嘅時候開始學去傾嘢，我係好鍾意講嘢，但唔代表我識傾，丁生就好識，佢話我過去喺娛樂圈生存到廿幾年係大命，佢解釋我聽啲人有時會點睇我，我話其實我唔係咁諗，佢話我做藝人應該要八面玲瓏，我嗰種講嘢叻，其實專門壞事，闖禍多過食飯。」

千嬅像小女人般接受老公批評，但聽完難免「哽哽哋」，之後專登上網自我回顧，重溫多年的訪問和得獎感受，她說：「原來啲字都『拮拮哋』，但我只係出於感性，冇諗過坐喺台下啲人個個接收唔一樣，係自己一個年少無知嘅經歷，好開心中年時有個拯救隊出現，等我可以好好糾正自己，覺得個仔性格好似我，外殼係我老公。」

採訪：卓寶花
攝影：林賓尼
攝錄片段：廖達燊
髮型： Vic Kwan @ii Alchemy Hair&Nail
化妝： Kineks Ho@LingChan Makeup