【怕講錯嘢急澄清】與勝利合作叫停 容祖兒強調：不接受不合法不道德的行

容祖兒昨晚壓軸現身「KKBOX香港風雲榜」，一身螢光黃色打扮、騷小蠻腰的她以國語歌《亞亞亞》打頭陣，接連唱出不少hit歌，最後唱出她與日前宣佈退出韓國天團BIGBANG的勝利合唱的《Pretty Crazy》，但昨晚祖兒唱出獨唱版本，祖兒完騷後接受訪問，更說起勝利。

祖兒今早忽然在微博澄清：「一直忙於排練，聽說發生了事情，但不知道已經發展到這麼嚴重。訪問引起大家誤會，十分抱歉。對於任何不合法不道德的行為，我是絕對不接受、不認同、不支持的！以後我也會更加關注時事及謹言慎行。 ​​​​」

事緣祖兒完騷後受訪時主動表示：「噚日自己都收到消息，覺得好shock、好突然，亦都好可惜，本來一路傾緊合作，但係因為呢個消息好突然，所以個製作都要叫停，自己覺得好遺憾，本身覺得勝利係一個好有才華嘅藝人，而家希望佢快啲冇事。」

祖兒又指本來首歌是合唱歌，她說：「我自己嗰part已經錄咗音，佢都有錄音，但因為牽涉好多後期嘅製作同混音，但而家咁樣樣就冇得繼續喇，真係好可惜、好可惜。」

祖兒又指：「其實本來今日勝利都會喺現場同我合唱，但係而家就冇啦！好多事情都趕唔上變化，希望佢快啲冇事。就呢件事我就唔應該講太多，佢哋公司亦唔希望我就住呢件事講得太多。」講到首歌無法合唱，問她會否繼續推出？祖兒說：「都會嘅，因為都花咗好多時間去製作，自己亦都好鍾意呢個作品，上星期亦都已經拍咗MV，所以會繼續推出，暫定會喺4月頭推出。」

講到鍾欣潼（阿嬌）早前在大陸的「金童玉女殿」為她點燈求姻緣，祖兒笑言：「係吖，多謝佢吖，咁頻撲，多謝佢都嚟唔切，真係好得意。一班朋友入面都好戥我緊張，正所謂『皇帝唔急』，我哋班朋友見到有人未結婚，又年齡適合就特別緊張，咩都出齊，佢哋成班好似餓狼傳說咁。」

另外見到她曬黑，祖兒說因為之前在韓國時好曬，問她是否去了海邊曬太陽，她笑言：「唔係，凍到咁點曬呀？去海邊沙灘識唔到男仔嘅，我哋呢啲靠實力，你哋唔使替我擔心，你哋再係咁呢，我要登報紙招親㗎喇，唔使擔心，我好OK，我反而早前睇到一篇文章就講啲朋友見一次就少一次，所以睇完篇文就即刻一次過叫晒啲朋友出嚟，大家好忙都肯出嚟，我好開心，總之我呢一刻好OK囉！」