【爆相爆片】「絕世好女友」唐詩詠感情疑有着落 孖百億闊少「的士邦」做義工

37歲「絕世好女友」唐詩詠情路崎嶇，去年跟拍拖2年半嘅洪永城分手，最近洪永城已經有新歡登場，與30歲模特兒兼長跑教練梁諾妍打得火熱；雖然唐詩詠身邊緋聞男友都車輪轉，先有「洗米華」周焯華愛將盧啟邦，上月輪到「英識教育」執行董事陳思銘登場，但兩男都未獲唐詩詠承認男友身份。日前，唐詩詠身邊又有新男主角登場，就係身家逾億、坐擁過百部的士嘅「的士邦」鄭子邦，被讀者張小姐透過「爆相爆片」分享。

據讀者張小姐表示，日前到將軍澳某間中學上禪修班，巧遇擔任義工嘅唐詩詠同「的士邦」，大讚兩人表現有禮貌，唐詩詠非常積極帶領隊員活動，完全冇視后架子，全程面露笑容，態度親切；而「的士邦」亦表現得好友善，耐心跟學員講解活動，同平時喺報道見到夜蒲嘅佢完全唔同。

張小姐在電話說：「嗰日朝早8點9上堂，好surprise見到佢哋幫手做義工，聽其他學員講，之前都有見到佢哋出現，不過上堂地點唔定。」張小姐話禪修班至6點完結，唐詩詠大約4點幾走先，「的士邦」就留到完堂才離去。「唐詩詠全素顏戴眼鏡，有人認到佢會打招呼，表現好nice。」問到點解會認出「的士邦」？張小姐話：「因為佢好熟口面，又叫阿邦，有學員對課程唔清楚，佢都好樂意回答。」

問到唐詩詠同「的士邦」係咪一齊到場？兩人表現似唔似情侶？張小姐話：「唔知佢哋係咪一齊嚟，不過見到佢哋出出入入都點頭打招呼，由於分小組進行活動，佢哋各自拍一位資深工作人員帶隊，表現得好積極好融入。」佢哋有冇同學員分享？張小姐表示：「有學員問唐詩詠禪修咗幾耐？佢話學習咗一排，仲話自己有壓力問題，都會透過禪修去放鬆，佢話自己都學習緊。」

早排唐詩詠話自己仲係單身，而「的士邦」於今年3月同姚子羚分手，上月被讀者「爆相爆片」直擊與湯洛雯在銅鑼灣酒吧廝磨，但靚湯就否認拍拖，依家唐詩詠同「的士邦」齊齊做義工，唔知兩位單身男女會唔會擦出愛火花呢！