【瘀事爆唔停】鄧小巧見偶像孫燕姿失心瘋 泳兒被男歌手抽住「格肋底」傾偈

由鄧小巧主理的網上歌唱節目《Singaholic》來到第三集，這集請來泳兒（Vincy）任嘉賓，節目中二人除了互唱對方的歌，傾偈時更笑料不斷。 節目一開始，小巧便十分「乖巧地」向Vincy問好：「師姐你好。」Vincy聞言「師姐」二字即大笑：「喂，好怪呀呢件事。」小巧便解說因為自己是最新加入公司的藝人，所以「叫每一個人都係師兄師姐。」小巧謂一直以來Vincy予人一種很養生的感覺，但原來錯晒，「我好surprise上次Vincy第一次嚟我屋企，竟然帶咗支紅酒過嚟。」Vincy謂自己平時很晚才睡覺，笑說自己一點也不養生，「That’s why我需要養生囉。」

泳兒跟小巧是公認的實力唱將，不過Vincy坦言從來沒想過當歌手，只是一直都很喜歡唱歌，「我覺得都係呃人嘅，我覺得參加歌唱比賽，然後佢遞份約俾你，嗰份約一定係有欺詐！哈哈。所以覺得係冇咁容易。」小巧則相反，打從小時候便幻想當歌手是一件很夢幻的事，她更是因為孫燕姿而入行，「好記得佢個『綠光演唱會』，我係睇video咋，覺得點解呢個人做歌手做得咁瀟灑嘅？佢有別於一般當時嘅歌手嘅感覺。我覺得：『咦？好想好似佢咁樣。』」她分享成為歌手後一次於活動上見到孫燕姿的經歷，「當時準備出我第二隻EP，我真係好想好想有機會見到佢，將隻唱片交俾佢，好想同佢表達我因為佢而咁希望成為一個歌手呢件事。跟住我見到佢，我係咁樣：『我嗚嗚……』完全講唔到嘢。由於孫燕姿已經係一個天后咗好耐嘅人，所以佢見到我呢啲咁嘅瘋癲嘅歌迷，佢好冷靜。同埋佢當時係身懷六甲，所以佢有啲係「嗯……嗯……」哈哈，但我就係好激動。」

除了孫燕姿，還有一次跟林宥嘉同場的經歷，「成日見到我啲偶像我會講啲好奇怪嘅嘢，有一次見到林宥嘉，喺backdrop影相，佢就：『hi你好』，我就話：『你好』，接住下一句我就話：『四年前我看你演唱會的時候，我還沒結婚，我現在就結婚了。』然後佢望住我，呆咗，然後話：『啊！恭喜！』我心諗：『鄧小巧唔好丟架啦！』」她又謂自那次孫燕姿事件後，她再見到自己的歌迷，便很接受歌迷對她做的任何事，「我自己都失心瘋咁樣，哈哈。」

分享完自己瘀事，便輪到Vincy自爆，「有一次發生咗一件好唔開心嘅事，喊到我覺得個靈魂都飛走咗。然後我揸車去錄音，錄完音返屋企，瞓醒第二朝就想攞車，跟住我發覺我架車唔見咗！我第一下好嬲，『搞錯！我已經咁黑仔！仲要架車俾人偷咗！』即刻想打去管理處鬧，但突然間，『係喎，琴日好似泊咗喺錄音室附近。』我嗰晚走嘅時候係call車走，我完全唔記得咗，我覺得係我心情差到一個點，我連架車都可以捨棄咗！哈哈。但我以為架車俾人偷咗，哈哈。」二人笑到拆天，隨後小巧問：「有冇知道我哋公司嘅藝人一啲𤓓嘢？」愈講愈興奮的Vincy又大爆一番，「大家平時嗌人，會拍吓佢手臂：『喂，小巧。』呢個人，因為佢係一座山咁高，佢好鍾意同我傾偈，但佢就唔知道自己好高，成日拉我呢嘅時候就拉咗我『格肋底』，哈哈。佢會成日拉住我：『Vincy你過嚟我同你傾吓偈。』跟住我就會俾佢咁扯走咗，哈哈。新人嚟嘅，Aiden呀。」不過小巧還未見過這位「師兄」，更對Vincy說：「我同你差唔多高啫，我160cm。」Vincy接着說：「我159cm。」小巧頓時醒覺，「哦，咁佢都會抽我格肋底喎，哈哈。有汗點算呢，哈哈，佢會話：『你個格肋底濕嘅師姐。』」Vincy立即反應，「咁我都乾爽嘅，哈哈。」說完這句後，二人大笑到喘不過氣來。

節目尾聲還有彩蛋，二人玩「暗黑二選一」，問到選「平胸」還是「大胸粗腰」，Vincy第一時間衝出答：「平胸！」聽到Vincy的答案，小巧立即瞪大雙眼並說：「你有梗係咁講啦你。」這時Vincy已經笑到癲，而且望着小巧胸部，小巧續說：「當你有大胸嘅時候，粗腰係nothing！但當你冇胸但係又粗腰呢，咁就something啦。我一定係揀波波。」