【Rosemary媽疑被騙】阿女14歲入行曾捲藏毒案 母女關係麻麻 嫁女唔現身

尋日有報導指，曾經喺香港活躍嘅混血模特兒Rosemary Vandenbroucke（Rosemary ），佢70歲嘅媽媽彭莉(Julie)懷疑捲入電話騙案損失2000萬。近年淡出幕前嘅Rosemary，因為未成年就已經出道，Julie經常陪同出入，但係有傳母女關係麻麻，Rosemary結婚Julie竟然冇到場。

Rosemary爸爸係法國人，媽媽Julie來自台灣，夫婦喺香港做成衣生意，家境唔錯。Rosemary 14歲參加Model比賽後入行，因為身形不俗同標緻臉孔，好快就成為灸手可熱嘅「天橋常客」。出道後Julie 做埋經理人陪住個女，據聞Julie管教甚嚴，初期Rosemary仍然聽話，但後來唔少傳媒報導Rosemary 爛蒲爛玩，亦不時傳出緋聞。

最經典一宗莫過於同王力宏(Leehom)嘅「疑似戀情」。當時Rosemary承認同Leehom拍拖，男方迅速否認後，Julie就鬧爆Leehom唔夠膽認，令到Leehom透過唱片公司再回應，否認同Rosemary私下聯絡，仲話要帶眼識人！

因為負面新聞多多，加上「0靚模」興起，Rosemary工作機會減少，2010年佢同男友Jason去美國參加「火人節」散心期間，因為藏毒而被當地警方拘捕。殊不知獲釋第2日，Rosemary退還租用的露營車時撞車，撞爛當地地標及消防龍頭，事後一度不顧而去，最終再次被捕。

而Julie自己都有過負面新聞，2004－06年間佢同Rosemary爸爸Alain離婚，二人因為財產分配而對簿公堂。最後法官判Julie同Alain以6:4比例分配資產，Julie不服而上訴但被駁回。

Rosemary 近年轉型成為瑜珈導師，2015年同一齊「經歷」藏毒事件嘅Jason結婚。有傳因為早年嘅財政糾紛，Julie並無出席個女嘅婚禮。而Rosemary 2018年生日當日誕下兒子Hendrix，一家三口樂也融融。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！