雅虎香港新聞 【Yahoo Lunch K・Backstage】雲浩影轉做全職歌手 專注唱歌試作曲
今集【Yahoo Lunch K】請到參加完《全民造星3》而為人所認識嘅「雲姨」Cloud 雲浩影，同大家傾偈唱歌。
大家都知道雲姨由參加《全民造星3》到比賽後都一直有繼續返工，兼顧住 OL 同歌手嘅身分，相當吃力。最近雲姨終於都搖身一變，成為咗全職歌手喇！雲姨就話一開始都以為自己可以應付得到同時做好兩份工作，但係始終作為一個歌手要花好多時間去做好自己嘅音樂，所以最後就決定專心做好一樣嘢，畀心機將最好嘅一面送畀大家。
好幸運嘅係雲姨能夠得到屋企人無限量嘅支持，喺參加《全民造星3》嘅時候因為比賽當中嘅服裝費開支都好大，當時雲姨嘅父母就叫佢專心盡力比賽，唔需要擔心屋企，唔洗畀家用住喇！比賽後嘅雲姨工作愈嚟愈順利，再加埋屋企人嘅支持，一定可以做好歌手呢份工作！
雲姨成為咗廣告界嘅新寵兒之外，最近仲嘗試咗拍人生第一套電影《深宵閃避球》。
喺節目中雲姨分享咗唔少拍攝趣事同感受，雖然係第一次接觸拍戲，Cloud就話都幾享受拍戲嘅過程，可以喺戲入面成為另一個人嘅感覺好新鮮，又可以同戲入面其他嘅演員一齊拼搏，佢哋亦都同初次拍戲嘅雲姨交流演戲嘅心得。
另外，有時候拍戲需要夾啱日出日落嘅時間，好多時開工嘅時間會好長，作為一個演員喺經常日夜顛倒嘅情況下，要keep住個靚樣同精神狀態都幾大壓力，Cloud 話雖然好攰但係可以參與電影拍攝好有滿足感！
除咗拍戲之外，一眾「迷雲黨」Fans 最關心等到頸都長埋嘅，一定係雲姨幾時先會推出自己嘅作品啦！雲姨就話好快架喇，因為接近年尾，希望可以配合到嚟緊全年嘅計劃，仲話會嘗試親自作曲，希望可以畀大家聽到自己喜歡嘅音樂，所以各位「迷雲黨」要等多陣喇！
嚟緊雲姨將會同 Alfred 許廷鏗有一個Music Live，到時會有佢地合作寫嘅歌聽。
講到呢次嘅表演，同前輩合作嘅雲姨就表示除咗緊張之外，都好多謝 Alfred 喺過程中嘅提點！
呢個 Music Live 10月12號就有得睇喇！
大家記得留意雲姨嘅 Social Media 公布詳情！
睇更多YAHOO LUNCH K BACKSTAGE內容：
