【I Remember You】Zen主音黃和興移居大馬住2300呎大屋 試過中風患抑鬱症 散band轉行做搬運

一聽I Remember You呢句，唔少80後都應該Remember 90年代樂隊Zen嘅成名作。當年Zen一炮而紅，主音黃和興因為靚仔有型成為band界偶像，甚至喺專賣明星相嘅信和中心商場成為銷量冠軍。不過紅得快跌得快，Zen簽約大公司5年後解散，黃和興之後喺娛圈中載浮載沉，仲喺2019年同太太移居馬來西亞。

網媒米紙早前去到吉隆坡訪問黃和興，而家阿興同太太住喺一個大型屋苑，屋企有成2300呎，超闊落之餘而且唔貴，4年前購入時只需港幣約350萬，仲要面對湖景，好開揚。而阿興仲透露一個月生活費大約1萬2千蚊港幣，難怪佢同朋友都覺得大馬比台灣更適合港人移居。

而家阿興睇落生活寫意，但當日Zen解散後，阿興曾經做過唔少工作，幕前演出之餘仲做過地產、金行，甚至為酒店做搬運工，而正好當時會場係舉行陳慧嫻嘅記者會，唔少以前同行都在場，阿興有一刻希望大家唔好見到佢。阿興2003年時試過窮到一日三餐捱麵包，亦曾經有機會同陳展鵬一齊入TVB試鏡，結果「煎pang」成功重返電視圈，阿興就冇份，令佢因此患上抑鬱症，試過9個月唔出街。

幸而後來黃和興做演唱會同廣告製作，收入亦反彈有6位數，但阿興深明行業萎縮，而且搵得多駛得多，於是同太太Happy有移民念頭，最後選定馬來西亞，因為「呢度係生活，香港係生存」。阿興亦坦言要回流香港「比較困難」，原來上年年尾阿興返過香港，發現好難再適應香港嘅步伐，加上以前試過喺香港因工作壓力中風，寧願選擇比較chill嘅馬來西亞。

阿興而家喺大馬再次做製作，近期有個商場展覽就係由佢同太太處理，另外阿興仲有個youtube頻道介紹大馬生活。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！