一文睇晒 李龍基未婚妻Chris被傳偽造學歷 徵婚 騙財爭議

• 有「御用皇帝」之稱嘅李龍基有過2段婚姻，2019年基哥宣布同細過佢36年嘅王青霞Chris拍拖。去年基哥表示打算年底同Chris結婚，但其後又確定婚禮延期，基哥解釋係因為家有白事。

• 縱橫歌壇多年嘅李龍基憑登台搵落唔少，更在大灣區擁有7間物業。去年初李龍基接受傳媒訪問時透露，佢已經將7個物業轉到Chris名下，確保未婚妻生活無憂，但今年佢又澄清物業轉到前妻名下先真。

• 王青霞嘅身份好快就惹來討論，李龍基話未婚妻家境唔錯並在外國留學，但亦有人話Chris曾在東莞做小姐。而王青霞喺IG分享過人民幣塞爆名牌袋嘅相，又不時展示富貴生活，有網民擔心李龍基變成「提款基」，但基哥多次為未婚妻解畫。

• 據李龍基介紹，王青霞係飛機工程師，有小型飛機駕駛執照，而Chris又自稱曾於內地北京航空航天大學以及多家美國學府就讀。但有網友發現，Chris嘅學歷及證明文件有可疑，有傳媒向部份學校求證時，都未能證實Chris曾經入讀。

• 學歷以外，李龍基同娛圈以及政商界朋友聚會時，Chris都會參與，更不時送上畫作。但有指Chris嘅「大作」同淘寶有售嘅油畫十分相似。

• 連串風波之下，王青霞接受專訪時自稱喺街頭被人襲擊，對方更叫佢「嘔返7層樓出嚟」，但Chris並冇報警。而Chris又拎晒就讀學校學費單據等文件，證明自己有家底，以反擊網友言論。

• 但係到上月下旬，有YouTuber爆出一名曾在美國西雅圖徵婚嘅男子歐陽偉，聲稱喺網上結識Chris並被借款美金3萬元，仲話雙方有過肉體關係。

• 後來王青霞再被爆2018年10月時喺美國同一名中年海軍疑似結婚，甚至有埋切結婚蛋糕嘅相。有網民計過數， Chris喺美國「結婚」嘅時間，同佢與李龍基交往嘅時間似乎有重疊。而 李龍基就再一次為Chris拆彈，話Chris當時同海軍男只係訂婚，直認自己先係橫刀奪愛嘅第三者。

• 一不離二二不離三，又又有人喺網上爆料話她王青霞自稱係名導演王穎同息影女星繆騫人個女，又聲稱契爺係著名武指程小東，並藉此向人借錢；曾為電影監製嘅蕭若元聲稱消息屬實，並指資深傳媒人岑建勳曾借錢予王。

• 連串事件後，王青霞刪走個人IG唔少舊帖，而李龍基回應傳媒時曾指「不能單方面支持，作為未婚夫，不能責無旁貸」，但基哥對 Chris依然不離不棄，早前出席活動時更現場叫住「老婆」想影合照，不過Chris就行咗去。

• Chris因逾期居留被捕，間接踢爆佢之前話自己以優才計劃來港嘅說法，而李龍基受訪時曾表示一直以為Chris的申請獲批。基哥都話自己可以返內地住，但係有太多工作喺香港難以成事。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！