一舞傾城丨7大情節穿崩睇到出晒戲 80年代家居驚現IKEA狗公仔

TVB劇集《一舞傾城》由王晶監製，以八、九十年代尖東舞廳做背景，講述一班舞小姐於夜店嘅人生及愛情經歷。劇集開播前已強調內有不少強姦、群毆、SM虐打、掌摑等情節，又表明參考台劇《華燈初上》製作，惹來熱切期待；不過，劇集播出已一星期有多，評價未如預期中理想，有觀眾批評劇情老套低俗，更指劇集存在相當多穿崩位，以下7大情節令人睇到出晒戲。

出戲位1：橋段與《霓虹姊妹花》相似？
有網民覺得《一舞傾城》並未如當初所講嘅港版《華燈初上》，反而與1989年藍潔瑛、梁藝齡、吳岱融演出嘅《霓虹姊妹花》橋段相似，都係將舞女大班、黑道大佬、卧底探員等撈理一碟，情節老土。

出戲位2：鳴謝名單被「佛山」洗板
《一舞傾城》喺佛山及廣州取景拍攝，片尾鳴謝名單中被「佛山」洗板，唔少佛山市民都留言表示：「佛山傾城」、「佛山萬國城」、「有一種自己鄉下出名了的感覺」等等。

出戲位3：KK拒絶50萬名錶見面禮
KK（陳星妤飾）為脫離繼父，照顧母親及弟妹而得萬國城夜總會「媽媽生」沙律姐（陳法蓉飾）收留，首日落場就遇到Marco（關楚耀飾）送上50萬名錶作見面禮，縱然KK貧窮需養家，但與Marco遊車河後竟將50萬名錶交還予對方，情節不太合邏輯。

出戲位4：過份吹捧處女
劇中以「萬國城最後一個處女」形容KK，強調處女值錢，更加入8百萬就可以買起初夜嘅劇情，網民直言道德觀念錯晒，又指教壞細路。

出戲位5：媽媽價值觀錯晒
KK媽媽（袁潔儀飾）於第2集被老公糯米雞（王俊棠飾）打傷後，向KK坦承自己曾任職夜總會舞女，又鼓勵個囡做舞女嘅話，就要去最大、最旺、最肯使錢嘅場去做，同時要做最紅嘅一姐，更替KK簽合約。第5集中，KK媽媽得悉有富豪願意用8百萬及豪宅買起KK嘅初夜，竟然勸佢答應，表示自己唔想再捱窮。

出戲位6：陳法蓉過份有義氣？
陳法蓉對旗下38組囡囡都好好，願意為佢哋於工作及愛情上解圍。其中一次，越南幫於萬國城用槍指住Money（文凱玲飾），喺對方威脅下，陳法蓉飲咗兩支烈酒，當越南幫離開時即時忍唔住吐血入醫院，令觀眾覺得情節太唔合理，角色偉大到有啲離譜。

出戲位7：居住於智能家居？
劇集設定於八、九十年代，但有網民發現劇中道具、髮廊及醫院場景都充滿現代感，而沙律姐（陳法蓉飾）家中更布滿電子產品，例如智能可視門鈴、冷氣控制面板、電子門鎖，以及IKEA狗狗公仔。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！