七線人棄王｜林秀怡大爆女藝人出埠叫男士陪瞓 嫌疑人共有7位？

TVB新節目《七線人棄王》由一班「七線」藝人陳俊堅、鄭雋熹、程浩駿、林浩文及姚宏遠擔大旗主持，仲搵嚟一眾好友嘉賓喺「七線爆料王」環節中揭開圈中秘聞；日前，嘉賓之一林秀怡就大爆有女藝人出埠工作時開口叫男士陪瞓，在場人士聽到好震驚，又笑指：「點解我聽唔到呢啲說話」。

林秀怡直言覺得個女仔好曳曳，因為本身自己都識佢男朋友：「我試過出埠嘅時候有個女仔好驚自己一個一間房，佢應該係好驚自己一個人瞓，當時我知道佢係有一個固定嘅男朋友，夜晚食完飯之後佢就問一位男士，可唔可以陪佢瞓或者去佢間房瞓，原因係因為怕黑。」佢續分享，該女藝人係喺大庭廣眾情況下問對方：「但你哋知道咗個女仔係邊個，應該就唔想照顧佢。」

一班「七線」藝人狂追問女藝人身份，但林秀怡就封口唔講：「總之係一個出外地嘅節目，我見到呢個女仔咁啦，然後呢個女仔好曳曳，好彩個男士係冇應承，不過就送咗佢返房，喺間房到逗留咗一個鐘度就走咗。」而其實林秀怡過往需要出埠拍攝嘅節目並唔多，最有可能係曾到江門和惠州取景嘅《大玩特玩》，當中女藝人包括朱智賢、陳嘉桓、歐陽巧瑩、邵珮詩、黃美棋、何佩瑜及陳芷尤，到底邊位有齊「有男朋友」、「怕黑」嘅條件，成最大嫌疑人？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！