中年好聲音追夢之旅︳追訪賽後生活 鄺凱剛陳嘉璐喜迎新生命 李佳同龍婷原來係閨密

《中年好聲音》圓滿結束差唔多一個月，TVB亦都為參加者舉辦演唱會。節目入面都有提到，唔少參加者各有參賽原因亦各有故事。尋晚TVB播出《中年好聲音 追夢之旅》，走訪多位參加者，了解佢地賽後生活同埋人生上嘅轉變。

當中最爆嘅係夫妻檔參加嘅鄺凱剛同陳嘉璐。鄺凱剛當日陪太太參賽，最終一齊打入100強，但喺首圈出局。而陳嘉璐就晉身50強，但未能再晉級。賽後無耐陳嘉璐發現懷孕，而夫婦亦都搬到新居，等候BB出生。

比賽之中有另一pair係前度夫妻許兆銘同呂卓欣，參加比賽之後關係有好轉，呂卓欣認為係節目令佢地拉返近。而另一位參加者、曾經為黃子華創作歌曲嘅羅金榮，亦喺完成賽事後到馬來西亞結婚。

至於冠軍周吉佩除咗奪標而回之外，仲同顏志恆、魏嘉信成為好友，甚至三家人會帶埋小朋友一齊去玩。

而亞軍李佳就繼續教學生唱歌，仲自爆同被認為係「勁敵」嘅龍婷原來係閨密。李佳同龍婷都係喺內地成長，因此相當投契，但原來起初李佳唔知道龍婷一早喺街頭演唱成名，要屋企人介紹先知。而李佳仲話首次見面同龍婷打招呼，對方居然好冷淡。不過最後佢地都變得熟絡，試過綵排期間去咗海邊食火鍋！龍婷大讚李佳唔鍾意同人鬥，會向佢透露自己決賽唱咩歌。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！