中年好聲音｜朱庭萱參賽追歌手夢 遺憾曾婉拒唱片公司邀請

近年TVB同ViuTV舉辦咗唔少真人騷形式嘅選秀節目，不過參賽者好多都係以年輕人為主，早前TVB就喺Facebook出PO，為《中年好聲音》進行宣傳招募。日前節目喺電視城進行面試，成功吸引唔少中年參賽者參加，除咗有《愛‧回家之開心速遞》「賈名媛」邱芷微（Chelffy）、「屯門娜娜」董幸兒、吳偉豪爸爸、張立基女友李亦菲及林師傑爸爸等人之外，仲有KOL「玻璃朱」朱庭萱（Bonnie）都有參加，期間佢仲自爆年輕時曾經有機會做歌手。

《中年好聲音》當日搵咗伍仲衡及張佳添擔任評審，而現年48歲嘅玻璃朱喺自我介紹時，佢就話自己喺年輕時參加過十八區歌唱比賽，仲喺灣仔區勇奪冠軍。佢仲話兒時嘅「我的願望」係成為一位歌手，去到長大後仲獲得唱片公司垂青，邀請佢去試音，不過佢最後因私人理由婉拒咗，而呢件事亦係佢一生嘅遺憾。之後，佢就話自此佢就同人講唔好為其他人或者其他原因去放棄夢想，好多謝TVB俾機會佢追夢。喺介紹自己職業時，玻璃朱表示自己從事金融工作，同時亦係一名KOL，亦有幫TVB拍過唔少煮食節目。

之後玻璃朱唱出葉倩文嘅《我要活下去》，可惜唱咗一分幾鐘就被叮走，當日有唔少參賽者唱超過三分鐘，唔知佢有冇機會可以入圍呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！