中年好聲音2丨劉威煌自爆曾眼紅許廷鏗 至今仍介意被封「億萬駙馬」

劉威煌2009年參加第一屆《超級巨聲》入行，及後被TVB安排與許廷鏗、林師傑及陳鴻碩組成「Super 4」出唱片，不過僅得許廷鏗彈起，劉威煌只演過兩齣劇和唱過兩首劇集主題曲，亦因為想專注唱歌，於是喺2015年與TVB和平解約。2015年劉威煌與棋人香港、Unleash Entertainment簽約，重新出發；惟2017年劉威煌轉行做生意，投資500萬成為台灣茶飲品牌香港總代理。去年年底，劉威煌回巢參加《中年好聲音2》，最後八強止步，並與TVB Music Group簽約，亦於今年3月自資推出新歌《普通人》。日前（1日），商業電台播出劉威煌作嘉賓嘅節目《星光背後》訪問，劉威煌自爆曾眼紅許廷鏗，亦直言介意「億萬駙馬」之稱號。

劉威煌入行前係一位月入達二至三萬嘅打工仔，做咗10年印刷sales決定放棄穩定收入簽約TVB放手一搏，直言起初嘅機會比較多，包括《巨聲》演唱會和annual dinner等等，但後來開始無咩嘢做零收入，劉威煌坦言當年曾眼紅許廷鏗：「當時我係有眼紅有羨慕，點解人地咁犀利？」 劉威煌亦提到2010年發表「實力股」言論被指暗窒羅力威而受網民圍攻一事，指當時係一個打擊：「實力股事件係最先遇到嘅打擊，係公關災難，識我嘅人就會知我無惡意，我同羅力威後尾都係friend嚟㗎。我無諗過撐A變了攻擊B，證明自己當時好幼嫩。」對於被冠以周星馳電影反派角色「常威」花名，劉威煌表示直至近年先唔介意呢個花名：「嗰陣對我係幾大打擊。畀人叫『常威』好嬲，因為係反派，代入咗『衰人』兩個字，好想為自己平反。後來先知好正喎，個個都記得我，同古淖文比賽都直接叫我『常威』，以前反駁係好傻，嗰陣我真係唔識網絡嘅運作。」

不過劉威煌對於2014年公開與拍拖7年嘅女朋友Sandy已於日本沖繩註冊結婚後，因有指女方家族喺內地經營礦業生意，家住半山區，並持有多個物業而被網民封為「億萬駙馬」一事，佢就坦言到宜家都介意呢個名，又指無諗過太太會被起底：「介意係因為老婆背景唔係網上所講咁勁，好困擾我哋兩個，因為事件涉及好多人，包括老婆同我嘅家庭，如果我食軟飯，就唔使工作啦。」劉威煌又於節目感謝太太18年來一直全心全意對待，包括其硬頸性格，事關太太於當年曾反對佢辭工入行，去年再戰《中年好聲音2》時亦曾第一時間反對，驚大家再受打擊，於是劉威煌對太太坦白參加目的只係因為自己鍾意唱歌，唔係想去再紅再做返歌手，會隨心努力做，叫太太唔洗擔心。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！