中年好聲音2丨網友直斥60強淘汰賽評審趕收工 梁浩賢唔值5燈 甘永傑foul得唔抵
TVB歌唱真人騷《中年好聲音2》於周日(22日)播出60強淘汰賽最後一集,30強名單亦已誕生!不過,網民就對名單有啲意見,指同一集誕生6位5燈歌手,包括梁浩賢、李振鵬、鄭梓浩、顏米羔、安雅希和陳燕娜,似乎有種趕收工嘅感覺,認為最後一批評分與前兩批評分對比下較鬆手,對第一二批落選選手唔公平,亦指梁浩賢、鄭梓浩、李振鵬、陳燕娜嘅表現唔值5燈,尤其係獻唱《偷偷摸摸》嘅梁浩賢。
對於梁浩賢嘅表現,唔少網民都留言畀負評,直指唔值5燈:「呢首歌嘅唞氣位都錯咗,咁都有5燈」、「唱得好辛苦咁,最盡三燈」、「佢應該是其中一個拿5燈卻不能服眾的一位」「唱得好難聽又唔夠氣」、「呢個水準都有5燈真係O晒嘴,次次都畀多佢,都唔知係咪同評判好熟」、「我個人就唔覺得呢位梁生值五燈囉」等等。梁浩賢其實係2000年《華人新秀歌唱大賽》冠軍,簽約華星唱片出過一隻碟,儲落唔少粉絲,不過當年遭遇唱片公司倒閉致歌手夢碎,參賽《中年好聲音2》第三輪海選時以自己作品《含蓄》表演,更被網民大讚表現超班,所以今次都有網民持正面評價:「中年好聲音,最有青春氣息的一位,傻乎乎的,好cutie」、「好好聽,我想入歌迷會呀」、「外表感覺好有以前eason feel,但聲似吳浩康,佢把聲系幾有歌手feel」、「好野,5燈」等等。
60強「1對1 PK賽」中,甘永傑和曾蜜詩呢Pair嘅對戰結果亦惹爭議,大部分網民都對曾蜜詩打敗甘永傑晉級感到意外,認為即使甘永傑當日發燒,演唱《陀飛輪》仍好聽過曾蜜詩首《美麗之最》好多:「相對於曾小姐,我更喜歡甘生嘅演繹方式,可惜參加比賽,除咗實力以外仲要具備運氣」、「永傑唱得好有感情,聽到眼濕濕」、「有冇復活戰? 甘永𠎀foul得唔抵」、「跌曬眼鏡, 曾的高音在喊(唔通識喊就贏?)聽到打晒冷震;甘永𠎀病咗都唱得好得多,聲音又靚,好有Talent,希望有復活賽啦」、「曾小姐唱得好辛苦,我都聽得好辛苦, 唔通中年好聲音真係要賣慘先至出到線」、「明顯甘永傑唱得好啲,出局真係令我覺得好意外」、「曾蜜詩我一路聽一路驚佢會走音聽得好辛苦,點解佢會可以出到線」、「蜜詩唱得很差,竟然晉級,真係莫名其妙,我唔知呢班係咩評審」等等。
出局後,甘永傑亦於IG撰寫長文,表示曾經一度質疑自己原來唱歌真係咁差,用咗幾日時間先消化出局呢個事實,亦曾經想逃避唔想睇返自己當晚嘅演出:「結果,睇返我帶住發燒12個鐘嘅身軀,聲音好差嘅狀態,盡力完成咗呢首難度好高嘅歌,雖然好多瑕疵,但係都唔係我想像中咁差,亦有俾我自己嘅情感感動到」、「嗰一刻突然諗通咗,點解我10幾年冇再參加歌唱比賽,係因為我根本冇鬥心、唔識同人比,我enjoy嘅係冇壓力咁唱歌表演,分享故事俾人聽」,更表示自己如釋重負,有返少少信心,亦希望有機會喺更多唔同嘅舞台唱歌。大量網民留下鼓勵說話,就連關智斌(Kenny)都留言:「絕對不失禮,so proud of you」。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!