中年好聲音2︳網民捕獲7強人馬拍外景 疑似踢爆劉威煌即將出局？

TVB綜藝節目《中年好聲音2》進入最後階段，今個星期日將播出決賽前最後一場比賽，並會再淘汰一位參加者，餘下7強喺3月24日總決賽爭奪冠軍。

雖然參加者同錄影廠保密工夫做足，不過有網民日前行過九龍灣某商場，見到7位參賽者正在參與拍攝。有醒目網友即刻知道，呢7個咪就係最後7強人馬？

照片所見，當日在場嘅有古淖文、黃劍文、陳俞霏、安雅希、譚輝智、沈宗賢及顏米羔，而喺8強名單嘅「巨聲幫」劉威煌唔喺相中出現，唔通八強止步？有傳媒向劉威煌求證，佢就話比賽仲進行緊，唔方便回應，而未來發展就磋商緊，一切落實後再講，答得相當不置可否！

比賽現時進入名次積分賽制，按各人表演得分排名，演出最高分嘅會得到8－12分不等，MVP再加2分，累積分數最低嘅被淘汰。8強之中古淖文以33分暫時領先，劉威煌及陳俞霏排最後2位，因此劉威煌出局唔算太意外。有網民就劇透將於星期日晚播出嘅比賽結果，指劉威煌及陳俞霏同分並列包尾，最後評判決定踢走劉威煌。係咪真？星期日就知！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！