中年好聲音2︳鄧兆尊細佬鄧兆榮為使命感參賽 「一生嘅遺憾就係未盡孝道」

《中年好聲音2》尋晚播出嘅第3集，已故名伶新馬師曾細仔、鄧兆尊細佬鄧兆榮登場，演唱《愛的根源》。不過表現未如理想，甩拍子之餘亦聽得出好緊張，最終只得2盞粒，相信入圍機會唔大。但係兆榮嘅「主要演出」，應該係演唱後嘅一段真情表白。

90年代中，鄧家爭產成為娛樂版頭條，後來新馬師曾太太祥嫂（洪金梅）同4名仔女和解。鄧兆榮憶述，到2013年四兄弟姊妹再同祥嫂有誤會，於是冇再聯絡，如是者過咗6年。到2019年，鄧兆榮鼓起勇氣，喺母親節打電話畀媽媽，誠心向對方道歉，仲話「不如你原諒我啦，以前嘅嘢邊個都唔好提喇。未來嘅日子，大家開開心心一齊過」。而祥嫂都好大方咁同兆榮講「好，我原諒你」，當時並向兆榮表示「身體有啲唔舒服，遲啲再搵你啦」。可惜鄧兆榮一個月後收到醫院急症室電話，先知道原來媽媽身患癌症四期，鄧家四兄妹再同媽媽團聚，鼓勵佢對抗病魔，但祥嫂一個多月後就離世。

講到呢度，鄧兆榮哽咽表示一生嘅遺憾就係未盡孝道，「我會同父母講，我喺你在世時可能做得冇咁好，但而家我會做個好爸爸、好弟弟」。鄧兆榮最終未能晉級，但就向觀眾表示，如果大家同家人有誤會，要行出誠意第一步，因為一家人冇隔夜仇。兆榮直言如果早一兩年打電話畀媽媽，就有更多時間重修舊好，而家只能後悔莫及。而鄧兆榮2個長大成人嘅仔都有到場撐爸爸。

另外，呢一集有好多曾經現身幕前嘅前藝人出場，不過有經驗唔一定等於得，2003年港姐季軍戚黛黛就只得一盞燈立即出局；前ViuTV主持「翻版容祖兒」羅沛淇都係得2盞燈。至於向氏後人向展鵬就以3盞燈等候入圍。而同肥媽情同母子嘅古淖文亦都喺尋晚出場，再遇當年參加《亞洲星光大道》嘅評審自然有主場之利，果然以5燈直接晉級。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！