中年好聲音2︳100強人馬率先劇透 已出道藝人加生命鬥士湧現 仲有「龍婷2.0」

TVB選秀節目《中年好聲音》反應不俗，4月總決賽時已經宣布開第2季兼接受報名，共有5千幾人參加。早前TVB舉行三輪海選，並於星期日晚播出《中年好聲音2 100強大召集》重溫面試情況，但係最緊要都係率先睇到入圍100強人馬。上一季《中年好聲音》都有類似安排，而出現嘅重點介紹參加者，最終都打入100強。

第一季冠軍周吉佩曾經出道做過歌手，於是今季都有唔少藝人都想借此「回鍋」，海選參加者之中已知嘅前圈中人有童星出身嘅「光頭仔」王嘉明、有份演劇集《一舞傾城》嘅千禧年代艷星顏仟汶、首屆《超級巨聲》嘅第五名「班長」劉威煌、90年代一碟歌手鄭梓浩、2003年港姐季軍戚黛黛、轉造塔羅師嘅姚安娜(曾用藝名姚琇齡）、參加過《全民造星3》嘅前 E-Kids 成員林詠倫(Alan)、2000年新秀冠軍梁浩賢、前英皇歌手洪杰等。

另一款典型參加者係明星親友，類似上季李思林（李玟二家姐）同支嚳儀（倪晨曦好友）。今季就有許志安哥哥許志偉、杜德偉胞兄杜德智、呂良偉弟弟呂良國、 鄧兆尊弟弟鄧兆榮同孫耀威妹妹孫美賢等喺海選出現過。

同上季一樣，有唔少生命鬥士參賽發放正能量。曾經為劇集《天地豪情》主題曲《說天說地說空虛》作曲填詞嘅陳寶雄，三年前因為糖尿上眼導致而家右眼視力近乎零，而左眼嘅情況亦開始變差。佢話今次參賽係要圓夢，希望再寫到 TVB 劇集主題曲兼自己唱番。

至於素人方面，今季海選都有唔少高手，當中曾經為三級片《私人會所》做導演、42 歲嘅顏金達（顏米高），海選時唱《你是我的眼》被判審伍仲衡大讚有「穿透力」，連周國豐都睇好係黑馬！另一位高手係有6個仔女嘅46歲媽媽麥素華，佢最大嗰個細路都29歲，最細嘅亦已經19歲。呢位媽咪選唱Rock 爆嘅《I Hate Myself For Loving You》，勁有爆炸力。仲有一位全職媽媽趙芮嵐，曾經參加過新秀，已經有三位仔仔但依然睇得又唱得。而以旗袍上陣嘅鍾維，面試時選唱《但願人長久》，被張佳添大讚聲線有鄧麗君嘅影子……咦，咪即係同上季龍婷同一套路？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！