中年好聲音2︳100強部份人選曝光 姚安娜爆冷出線 仲有肥媽愛將同周吉佩2.0

TVB選秀節目《中年好聲音》反應不俗，4月總決賽時已經宣布開第2季兼接受報名，共有5千幾人參加。早前TVB舉行三輪海選，選出入圍100強人馬。有傳媒聲稱確認當中10位參加者，都係本身有一定知名度或者係明星親友。

第一季冠軍周吉佩曾經出道做過歌手，於是今季都有唔少藝人都想借此「回鍋」。據知獲選入圍嘅10位百強人馬當中，9位都係曾出道甚至仍在演藝圈嘅「周吉佩2.0」。當中首屆《超級巨聲》嘅第五名「班長」劉威煌、《全民造星III》獲第9名的黃劍文（Kimman）及亞視《亞洲星光大道》第一屆10強人馬古淖文（German），背景最似周吉佩。劉威煌參加《巨聲》後留喺TVB多年，早兩年先離巢；而黃劍文就曾經係ViuTV旗下藝人，至於來自澳門嘅古淖文，參加《亞洲星光大道》時獲肥媽賞識，加上大家都係澳門出身，肥媽不時會搵古淖文一齊演出。另外，早前約滿ViuTV嘅「翻版容祖兒」羅沛琪都打入100強，背景同樣似周吉佩。

被網友取笑以電影《小丑》主角造型面試嘅前歌手兼塔羅師姚安娜，出人意表地入圍初賽。姚安娜16歲參加新秀，曾經簽約TVB，到1997年正式出道，但因合約問題而「一碟玩完」，後轉當塔羅師，並且同家人移居台灣。拍過80年代港產片《最佳拍檔》系列嘅「光頭仔」王嘉明，據報亦成功入圍。王嘉明長大後曾經出碟做歌手，早幾年亦獲邀演出TVB《流行經典50年》。

海選時自爆有6個19至29歲仔女嘅46歲單親媽媽麥素華，因為表現出色突圍而出。呢位澳門媽咪選唱Rock 爆嘅《I Hate Myself For Loving You》，勁有爆炸力獲大讚。同樣嚟自澳門而又入圍嘅仲有當地創作歌手龍世傑。

面試時選唱《但願人長久》並以旗袍上陣嘅鍾維，被評審張佳添大讚聲線有鄧麗君嘅影子，同上季嘅龍婷套路相似，加上兩者都係內地出身，因此鍾維被稱為「龍婷2.0」，佢都成為今屆《中年好聲音》嘅入圍者。

十位據知入圍者當中，較少幕前演出經驗嘅係孫耀威細妹孫美賢。孫美賢同阿哥一樣鍾意唱歌，今次更加係由瑞士返港參賽，成為暫時已知第一個「明星親友」入圍者。唔知其他「明星親友」又有冇咁好彩有得玩呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！