中年好聲音2｜ 14強團歌一鏡到底MV出爐 網民狠批：如果自己係監製一定唔收貨

TVB歌唱真人騷《中年好聲音2》踏入最終樂章，上周日（10日）已誕生8強，總決賽將在本月24日舉行。隨住節目已屆尾聲，14強中二生亦為團歌進行錄音，包括古淖文、黃劍文、譚輝智、顏米羔、陳蒨葶、陳燕娜、陳俞霏、王玥、林若盈、劉威煌、沈宗賢、鄭梓浩、安雅希和劉可。團歌由評審張佳添監製，歌曲改編自容祖兒《隆重登場》，並送去英國做後期製作，MV亦採用一鏡到底方式拍攝，對演戲經驗唔多嘅中二生充滿難度。不過，有《中年好聲音2》支持者就對團歌有意見，更於社交平台出PO力數《中年好聲音2》團歌罪項，表示睇咗中二生個MV，指如果自己係監製一定唔收貨。

《中年好聲音2》團歌罪項1：遲遲未發行團歌、缺乏創新
該網民將中一生與中二生比較，指中一生團歌《我們的名字》於比賽中段已推出，中二生推出團歌時間相對遲，而且僅僅係改編容祖兒《隆重登場》，缺乏創新，予人一種應付差事嘅印象，《中年好聲音》團歌明顯較好。

《中年好聲音2》團歌罪項2：男女聲唔協調
歌曲中，男女聲部分協調性極差，即使係歌詞分配都顯得隨意，無經過細心安排，導致成首歌聽起嚟好突兀。

《中年好聲音2》團歌罪項3：製作質量低下
團歌MV採用一鏡到底方式拍攝，不過該網民似乎唔係好buy，直言一個鏡頭過中學生都拍到，加上從MV製作嚟講，不僅節省成本到極點，亦睇得出中二生訓練時間好短，以及感到團隊幕後製作明顯比中一生團歌嗰陣馬虎了事。

《中年好聲音2》團歌罪項4：訓練不足
參與嘅中二生訓練時間明顯不足，舞蹈動作顯得未夠熟練和默契。

《中年好聲音2》團歌罪項5：利用劉可人氣
團歌由14強獻唱，網民卻認為TVB一早淘汰咗劉可，但又利用佢嘅人氣幫手助陣，覺得呢種做法顯得低俗。

該網民又表示，回想起黃劍文於日前比賽當晚，似乎有意於評判講完後想講嘢，但就被叫「聽話喇」，指評判團不僅唔尊重人，又壓制言論自由。對於該網民言論，網民反應兩極，有網民就回應指樓主太大偏見：「有job俾牛可做唔好咩？你哋牛粉唔係成日想增加佢人氣㗎咩！依加又話TVB利用佢，其實牛可而家多人識佢都係TVB畀佢㗎，佢應該多謝TVB，而唔係樓主你所講嘅利用，如果TVB真係利用佢就應該擺佢响C位，同埋佢响MV入面出鏡率唔多㗎。」、「係唔係想 TVB 完全 boycot 停止用牛河 先至開心 ？」、「好多大師級art films都會用一take過 去拍，不是你口中所講咩中學生都識拍嘅嘢」等等；但都有網民認同該網民，表示MV拍得好求其：「個場景係甩皮甩骨，又同佢哋九唔搭八」、「呢條片拍得好求其，大台只顧搵錢，話之你死」、「見到喺民初街拍就知慳皮到極，外景都費事出，要outdoor廠景搵個最快有期既即拍囉」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！