【中秋節好去處】 大圍至大埔單車一日遊 小白鷺全新歐陸餐廳+咖啡市集+IGable café

今年中秋節有四連休，雖然暫時無法外遊，不如好好計劃這幾日的本地遊行程吧！襯著秋高氣爽之際，不妨來個單車一日遊！今次推介行程，先在大圍新開IGable café叉叉電，再租架單車踩到去沙田逛逛咖啡市集，晚上入大埔小白鷺湖互動中心的新開西餐廳「Billow」睇燈飾兼嘆西餐，簡簡單單就係一個完美的假日！

01：大圍IGable café 藍白主調好打卡
大圍新開的咖啡店「雲蝶 Na.Bi」，以藍白色為主調，木枱配白牆，裝潢簡約舒適，雖然店子細細只有十多個座位，但設有戶外吧台座位，感覺有點像赤柱歐陸小店。店子由一對90後年輕夫婦主理，以簡單輕食作賣點，好似黑松露薯蓉、炸魚薯條、黑啤雞翼，就連炸Oreo都有，份量夠大，出名大件夾抵食，不論係街坊定區外客都會特意嚟幫襯！

「雲蝶 Na.Bi」
詳情: 按這裡

02：踩單車入大埔 每半個鐘只需$3
食飽影夠，不妨租單車從大圍踩去沙田，再入大埔。雖然大圍有唔少單車店都提供大圍租、大埔交車的服務，但價錢同自由度都唔及共享單車LocoBike。Locobike每半個鐘只需$3，用家可預先安裝Locobike App，用App內地圖尋找有單車的地方，找到後再掃一掃車上QR Code就可以使用。 最後只要於指定泊車位，用手動上鎖即可，非常方便。

Locobike
詳情: 按這裡

03：一連四星期咖啡+家品市集
踩入大埔之前，不如去沙田HomeSquare睇睇一連四星期舉行的「咖啡·家·市集」。活動由即日起至10月18日於5樓平台花園舉行，邀請了20個本地設計及手作品牌，有家具、咖啡品牌，於周六、日及公眾假期更會舉行不同的藝術工作坊，如咖啡渣紮染服飾、香薰咖啡蠟燭等。雖然今次未必夠時間玩工作坊，但至少都飲杯咖啡，欣賞一下不同風格的生活產品吧！

「咖啡·家·市集」
詳情: 按這裡

04：小白鷺全新歐陸餐廳 戶外草地設發光兔兔
繼續踩單車出發，經過馬料水白石角海濱長廊、科學園等地，可於大埔墟站附近先交還單車，再於大埔墟站公共小巴總站乘搭28K去小白鷺湖互動中心。經過接近兩年嘅翻新，小白鷺湖互動中心新開一間面積達3000呎的歐陸風西餐廳「Billow」，店子主打多國菜，純白色的小屋，設有戶外座位，配上白鷺湖景觀及綠油油草地，彷彿置身於歐洲一樣。適逢中秋節，餐廳於9月30日至10月2日在戶外草地放置多隻發光兔兔，成件事都超浪漫！

Billow
詳情: 按這裡