九十年代歌手相繼開紅館 下年到梁詠琪 網民反應兩極︰以為開流行經典50年

呢幾年因為疫情冇得飛，造就香港娛樂市場出現「小陽春」，MIRROR追星熱唔使多講，今年港產片亦大發神威，至少有4套票房超過3千萬。連帶紅館演唱會都一票難求，新一輩嘅林家謙、洪嘉豪同湯令山(Gareth T)都極速爆場。年底陳奕迅同鄭伊健都會殺入紅館，啲飛一樣搶到飛起。

早兩日Gigi梁詠琪喺facebook post咗段片，係Gigi聲稱去「影海報」相，中間有幾粒字被消音，但唔難估應該係「演唱會」3個字！有傳2018年開過紅館show嘅Gigi，將會喺下年農曆年過後再開紅館。

不過網民反應比較兩極，fans當然撐啦，但係亦有人認為近年一批新晉香港歌手，成功吸引返歌迷留意香港音樂，而一批八九十年代走紅嘅前輩呢個時候開show，似有「收割」之嫌喎。甚至有人覺得係「以為開《流行經典50年》」！

近年Gigi幕前工作再次活躍，拍ViuTV劇《反起跑線聯盟》及MIRROR成員Edan（呂爵安）主演嘅《闔家辣》，轉型做媽咪角色反而睇得舒服，加埋一批多年歌迷支持，梗係撐得起開紅館show！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！