九龍城寨之圍城丨伍允龍被網民讚好戲 由木頭人化身Joker：終於突破自己

電影《九龍城寨之圍城》於5月1日香港內地同日上畫，首日票房極速衝破500萬，好評滿滿。日前，伍允龍、林峯、胡子彤及張文傑現身謝票場答謝觀眾；其中，伍允龍與觀眾當場示範「寸勁」，出完招之後伍允龍與該名觀眾握手，但對方「突襲」力撞伍允龍，令佢失平衡倒地，仲大聲問伍允龍：「係咪輸比我？」，成為城中熱話。不過，伍允龍當時用返戲中嘅角色設定講笑：「你地睇到啦，我唔識神打架」，被網民大讚EQ高。另外，伍允龍演技更被網民激讚，認為佢終於突破自己。

電影《九龍城寨之圍城》改編自余兒原著小說《九龍城寨》，斥資3億元鉅製，電影場景幾乎真實還原八十年代嘅九龍城寨。伍允龍飾演大反派「王九」，為大老闆麾下嘅頭號人物，武功高強，身懷硬氣功及鐵布衫等絕技，近乎擁有不死之身。唔少網民對於伍允龍今次嘅演技眼前一亮，大讚好戲，認為對比以前TVB時期嘅佢有激大進步：「明明佢以前套套戲都冇表情，正宗木頭人，今次好跳制，有joker feel」、「佢終於突破自己」、「呢套佢真係做得好好，睇到好驚喜」、「真係佢代表作咁，做得好癲」、「我反TVB睇開Viu都開始欣賞TVB藝人演技」、「伍允龍可以彈起未」等等，又有網民覺得伍允龍飾演過《城寨英雄》，因而更容易掌握呢次嘅角色：「佢拍左幾十集城寨英雄，易d上手」，又有網民提起2014年伍允龍與安志傑合作嘅功夫片《惡戰》，指佢同安志杰當時都係全盛時期。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！