九龍城寨之圍城｜劉俊謙被封新一代「國民老公」 面對「劉太」湧現 蔡思韵大方回應

劉俊謙與蔡思韵係圈中嘅模範情侶，二人於2019年合作電影《幻愛》擦出愛火花，公開戀情後不時以情侶檔出席公開活動和接受媒體訪問，互動非常甜蜜。劉俊謙與蔡思韵背景與對表演嘅認知相近，一直以嚟於幕前幕後互相扶持。近日，劉俊謙因大熱電影《九龍城寨之圍城》「信一」一角人氣急升，被封新一代「國民老公」，面對一班「劉太」湧現，蔡思韵大方回應。

蔡思韵昨日（29日）出席時裝品牌宣傳活動，同場更有林德信、倪晨曦、隋棠，以及泰星Tor，蔡思韵接受媒體訪問期間被問到對劉俊謙擁多個「劉太」嘅睇法，蔡思韵笑言：「恭喜佢，好開心啊，恭喜劉生」，續指見到咁多人喜歡劉俊謙，覺得好開心：「都代表佢呢個角色（信一）非常成功嘅，所以喺呢個情況下，我係OK一夫多妻，祝福佢」，答得相當大方。

另外，蔡思韵喺《九龍城寨之圍城》中飾演陳占（郭富城飾）妻子，雖然僅得一場戲份，但角色相當重要。而由於現場拍攝技術問題，該場掌摑龍捲風（古天樂飾）嘅戲需要多角度拍攝，蔡思韵因而掌摑咗古天樂好多次，古天樂亦需要冰敷去消腫，古天樂笑指蔡思韵係全套戲最好打嘅人。蔡思韵又表示如果有幸參與兩部續集《九龍城寨之龍頭》及《九龍城寨之終章》，希望可以增加打戲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！