亞洲超星團丨LOONG 9成團出道惹5大負評 被指造馬 趙天翼慘被玩

TVB與優酷合辦嘅偶像選秀節目《亞洲超星團》成團之夜總決賽於上周六（9日）圓滿結束，18強練習生歷經7個月時間終於喺約兩小時比賽中爭取出道，第1位奧利、第2位李權哲、第3位冼靖峰、第4位江信熹、第5位梁詩煜、第6位白子奕、第7位文佐匡、第8位黃奕斌及第9位陳梁正式成團；超星召集人曾志偉宣布：「我哋《亞洲超星團》終於可以成團啦！恭喜九位，我喺度正式宣佈，我哋為你哋成團要俾一個名你哋，你哋出道個名叫做『LOONG 9』。」又透露《亞洲超星團》第二季立即接受報名。《亞洲超星團》賽果公布後引起大量負評，包括團名唔好聽及賽果造馬等等，網民力數以下五宗罪。

第一宗罪：公布賽果方式似玩人 趙天翼落選仍呆企台上
大會由第8位開始宣布入圍名單，倒數至第3位，之後公布第1同第2位成績，最後公布第9名，以營造懸念及刺激感，不過網民認為呢種方法非常殘忍，尤其係陳梁和趙天翼同時出列等待最後一個入團名額，趙天翼敗走後更要企喺台上聽陳梁感謝宣言，網民紛紛替趙天翼未能成為最後九人出道感可惜，更不解點解要咁公布賽果：「點解要咁樣戲弄天天」、「真心.....佢輸都已經夠慘，仲要佢出嚟為乜？」、「正正經經宣讀第九名便算，又找埋第十名（天天）來攪」、「我都覺得好過份，其實已經好緊張，仲要咁對佢」、「一早知天天冇份，又要一齊行出嚟令佢超尷尬」等等。

第二宗罪：團名唔好聽
9人出道團名定為「LOONG 9」，唔少網民都覺得呢個名奇怪又唔好聽，除咗諗起《賭俠》入面陳法蓉名字「龍九」，又認為「LOONG」與「燶」同音唔好意頭；加上由於曾志偉當時係以英文宣布團名，令網民覺得讀音「隆奶」有不雅之想法，又有網民覺得其團名好似臨時改咁，希望可以收回團名，畀團員自己改名及應援顏色。

第三宗罪：賽果有造馬之嫌
唔少網民不滿賽果，認為有造馬之嫌。賽果公布後，台下曾有兩名粉絲衝到控制台後面大鬧造馬，直指自己課金咗18萬，但支持嘅參賽者卻未能成團，保安即時上前阻止二人及報警。網民紛紛對金東彬和郭殿甲大熱倒灶感失望，更表示唔明點解文佐匡、冼靖峰都入到圍：「權哲有差不多700萬的粉絲，實力超班，竟然只得第二，賽果確實有點奇怪」、「Sean第七Sky第十？咪玩啦」、「做馬，第三名同第四名係咪應該調轉？」、「冇可能有冼靖峰，跳舞完全唔掂，大把好過佢」、「張鎬濂、譚奕天、郭殿甲都好過香港入咗團果三個啦 做馬做到出晒面」等等。又有網民提議TVB可以改返個正常少少嘅團名再開多一團以作補救。

第四宗罪：文佐匡被指買名次？
對於賽果，好多網民都覺得文佐匡未夠資枱入圍，更有網民爆料指，於投票結束前，文佐匡被狂轟50萬星耀值，惹起爭議：「造馬得太過份，文佐匡绝對未夠班入圍，郭殿甲，尹俊嵐及好多高質數的反而不能入圍，很過份，無線（綫）唔好累有天份的人前途」、「趙天翼咁有才華，外貌都唔錯，一直人氣高企，點解又會輸比文佐匡？」、「之前Sean一直無表現，好過佢嘅人太多太多太多，點解佢會入選？太唔公平」、「Sean入到簡直係離哂譜，其實選佢入去俾人話做馬，對TVB同Sean嚟講，都係得不償失。」、「Sean入到令人好意外， 表演一向麻麻， 又無咩觀眾緣， 上集排名突然殺到甘前， 令人難免覺得名次系買返來的」等等。

第五宗罪：練習生黃輝雄暈倒後照表演？
有網民分享於現場拍攝之影片，其中影到練習生黃輝雄於表演完畢準備下台時見暈幾乎跌倒，靠隊友扶住離開；不過，節目組仍於其後安排佢表演至完騷一刻，令人擔心。事後，有網民幫手解釋指黃輝雄當時傷及舊患，只係太痛行唔到。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！