亞洲超星團︱初印象人氣排名出爐 頭10位香港代表佔2席 丁子朗排第21位

TVB全新偶像選秀節目《亞洲超星團》將於周六（25日）正式播出，優酷國際版將同步上線。節目邀請亞洲舞王Rain擔任節目總製作人，並搵嚟農夫、蘇志威、程瀟及朱正廷擔任超星導師，更雲集65位來自內地、香港、澳門、台灣、日本及韓國等地嘅「超星練習生」，致力打造一隊具影響力嘅7人限定男子組合。日前節目有先導片出街，片中搶先公佈練習生們嘅「初印象人氣排名」，香港代表嘅排名成績不俗，有兩位成功打入頭十位。

喺先導片中，一班練習生首先預測網民對自己嘅「初印象人氣排名」，然後揀選1－65號嘅座位，咁樣就可以令觀眾了解佢哋嘅性格。另外，片段亦有公佈練習生們嘅「初印象人氣排名」，頭十位分別係利、李權哲、譚奕天、鐘駿一、陳鑫昊、尹俊嵐、冼靖峰、張勝希、張鎬濂及江信熹。

《亞洲超星團》香港代表包括丁子朗、黃奕斌（Hugo）、冼靖峰（Archie）、文佐匡（Sean）、洪欣兒子張鎬濂、歐陽妙芝兒子方玉亨、黃星綽、區珀豪及余宗遙。喺「初印象人氣排名」頭十位中，香港代表佔兩席，分別係第7位嘅冼靖峰及第9位嘅張鎬濂。而其他嘅香港代表分別係第18位嘅文佐匡、第20位嘅黃奕斌、第21位嘅丁子朗、第26位嘅方玉亨、第34位嘅區珀豪、第37位嘅黃星綽及第44位嘅余宗遙。

排名第一位係內地代表17歲奧利，佢曾經參加過韓國男團選秀《BOYS PLANET》。今次佢參加《亞洲超星團》一出場已經成為焦點，成為人氣王。奧利就話緊張到腳震同感到好大壓力，因為覺得自己冇能力排第一，所以需要更加努力去坐呢個位置。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！