何伯何太又開直播 造人3個月仲未得 新何太又講錢︰三五百萬算係乜嘢錢？

早前向《東張西望》申訴嘅何伯同新何太，成為城中熱話半個月，幾度登上《東張》之外又開網上直播，大爆何伯「一晚5次」，仲公開何伯仔女私隱表明反面，花生殼一地都係。

紅完一輪嘅何伯夫婦星期一又喺社交平台開直播，本來話係帶貨，但因為帳戶被舉報變成齋吹閒聊，不過今次何伯冇咩出聲，唔知係咪新何太「落order」。早前有網民見到何伯夫婦返去新何太鄉下陽江，忖測係咪因為早前大爆任職警界嘅大仔私隱搞到要避風頭。何太直播時承認身在陽江，並霸氣回應網民鬧佢「影衰陽江」嘅留言。「我一啲都唔衰，我個人行得正企得正，滿身都係正氣」。

之前直播時新何太話想同何伯「整返件」，今次直播又有網民追問「造人進度」，何太回應話呢3個月「籌備緊」但未成功，「四字頭」嘅新何太又話聽講過咗40歲之後懷孕有難度，唔敢期望太高。新何太又否認生仔係要繼承被何太細女提取嘅450萬。「嗰少少錢都未夠我老公嘅生活……三五百萬算係乜嘢錢？」，又指何伯有病都係去私家醫院睇。雖然口講450萬細數目，但何太堅持要拎返，因為係何伯嘅血汗錢。

何太今次直播繼續幫自己「洗底」，話佢《東張西望》未訪問佢地之前，街上唔少人都好羨慕佢地兩夫婦，又話「何伯以前好靚仔㗎」。今次甚少出聲嘅何伯又再次強調冇俾過錢太太，新何太好快就加把口話「我一蚊都冇貪過佢，我係欣賞佢嘅為人人品好。如果人品唔好，就算有百幾億我都唔睬佢」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！