何廣沛被爆有新戀情 直認發展中 靚女友係公關公司創辦人

被傳同朱晨麗撻著多年嘅何廣沛，今年初被發現冇再喺IG FOLLOW「好友」，令外界懷疑二人感情生變。而今日有傳媒踢爆何廣沛已經有新戀情，仲話何去年十一月因為同新女友去旅行，請假唔參加TVB嘅節目博覽活動，而當時何廣沛喺微博發文，就顯示佢身在韓國。

有傳媒向何廣沛求證，佢承認同圈外女友發展中，希望大家俾啲空間佢地。而疑似何廣沛新女友嘅Sarah，據IG資料顯示係公關公司創辦人，負責宣傳嘅項目都有一定規模，品牌客戶唔少都係國際大牌子，合作嘅藝人有Anson Lo盧瀚霆、MC張天賦、張敬軒等。

入行多年嘅何廣沛唔算多緋聞，初期同TVB小花周梓盈拍拖5年，分手後何廣沛同朱晨麗因為《超時空男臣》而撻著。雖然何廣沛成日被影到出入朱晨麗屋企，但係佢哋無公開承認拍拖，直到今年初何冇再follow對方IG先傳出分手。而何廣沛拍《異搜店》時一度傳出被劇集女主角陳曉華主動埋身，但後來無下文。呢期何廣沛去北美參加TVB宣傳活動，同行嘅仲有周奕瑋同前緋聞女友陳曉華……乜咁巧合呀？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！