何超儀大談感情生活及爸爸何鴻燊遺產分配 賭王揀女婿原來要符合呢個條件

已故賭王何鴻燊二房千金何超儀（Josie），一向俾人性格剛烈、爽直及反叛嘅感覺。日前佢為《魯豫有約一日行》第12季擔任嘉賓，與魯豫談及入行經歷、與老公陳子聰嘅感情生活，及爸爸何鴻燊嘅遺產分配等話題。

家族背景顯赫嘅何超儀，並冇好似其他兄弟姐妹咁選擇做生意，反而選擇加入娛樂圈做演員及歌手，不過佢嘅演藝之路並非一帆風順，佢曾經表示多年來都處於半紅不黑嘅狀態令佢鬱悶，及自己需要比其他人付出三倍嘅努力，但都未必能得到認同。而佢喺《魯豫有約一日行》中就話自己叛逆嘅關係，當時父母唔允許佢加入演藝圈，因為驚佢得罪好多人。喺佢追演藝夢嘅初期，雖然屋企人冇全力支持佢，不過好彩得到家姐何超瓊嘅支持，家姐因為要撐起整個家族嘅重擔，所以放棄拍戲嘅機會，唔想妹妹又遺憾。而家姐仲喺佢最需要支持嘅時候，代表佢同爸爸媽媽爭取認可。

而被問到爸爸何鴻燊嘅遺產分配時，何超儀就話：「平均了，當然比為家裏工作的姐姐弟弟他們會少一點了！所以我一年不能拍太多部片。」之後主持人就追問：「如果花完，姊姊會不會不管你？」何超儀就回答話：「（姊姊）不管，她覺得餓不死我就可以了！自己找來的。」

提到與老公陳子聰感情生活，二人喺2003年11月於澳洲註冊結婚。何超儀就話自己係俾佢嘅善良性格同靚仔外表所吸引，仲話拍拖初期曾因陳子聰外表而令佢有危機感。喺佢哋結婚前，爸爸曾經搵過陳子聰詳談，並認為對方善良而且笨笨的，唔需要太聰明，而爸爸揀女婿有一大要求，就係要佢搵「一個帥哥」，亦唔可以太矮。之後，何超儀就表示冇難過離婚：「全家總動員幫自己籌辦婚禮，大姊、二姊、三姊、弟弟，連小姑媽都回來香港幫忙。這很震撼，他們那麼用心幫妹妹結婚，所以我這個婚結了之後，我怎麼樣都要把它堅持下去。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！