余子明效力TVB逾40年 對一年一騷$6800合約心淡拒簽

77歲嘅余子明嚿年拍畢劇集《踩過界II》就離開咗效力逾40年嘅TVB，不過佢卻未有退休，近日更拍攝ViuTV新劇《940920》。余子明接受媒體訪問時，指比起拍TVB劇集，拍ViuTV劇集唔會太辛苦，又提到當初不甘被TVB「一年一騷合約僅包薪$6800」綁死，自言對此對待心淡而拒簽離開。

余子明指拍攝ViuTV《940920》每次都有專車接送又唔洗捱更抵夜，從來未試過拍劇咁嘆，相反喺TVB嗰陣就試過因為拍攝《平安谷之詭谷傳說》，兩星期都瞓唔夠40小時，意識到身體頂唔順先去睇醫生。余子明更於2000年喺內地拍攝《尋秦記》時意外喺馬車上跌落嚟撞傷頭，不過當時睇少咗其傷勢繼續開工，回港後因腦積瘀血昏迷入院做開腦手術，及後自付廿萬手術費，經囝囝幫忙睇過TVB份勞保後，TVB只畀返大約兩萬元佢，至今余子明個頭仲留有凹泂。余子明未完全康復之際，深怕影響拍攝進度所以趕住開工，直言應承咗人就要做好件事：「我點辛苦係我嘅事。」

為TVB賣心賣力，卻被改成一年一騷合約僅包薪$6800，余子明以「心淡」形容：「淡，淡得好緊要添呀，我都估唔到無綫突然間變到咁樣。」亦只能以「自己年紀大，呢個社會係咁現實」自我安慰。余子明直言未改合約前，單靠TVB份糧絕對係唔夠，所以聽到邊到有錢搵就會去，登台賺落嘅錢就交畀太太馮素雲買樓投資。余子明未成為演員前，由記者轉為歌手，曾與徐小鳳同台演出，佢而家就希望拍劇過戲癮之餘，可以喺紅館搞一個慈善演唱會，將所有收入捐給慈善機構。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！