雅虎香港新聞 大角咀共享平台化身社區會所 免費借出廚師機露營用具等 500 物品：可以借 點解要買？
【Yahoo 新聞報道】「可以借，點解要買？」是大角咀的共享平台「借嘢」的口號，不求牟利，但求資源共享。「借嘢」引入外國「物品圖書館」概念，鼓勵街坊將閒置物品捐出，再免費借予其他街坊使用；偶爾只用一兩次的物品不用動輒購買，避免造成浪費，例如一生人只想用一次的「Marry Me」燈箱、結婚「斟茶」茶具，不容於蝸居的廚師機、氣炸鍋及單車等，甚至小至羽毛球拍、螺絲批、UNO 卡牌，均可在「借嘢」找到。「借嘢」藉此連結街坊鄰里，亦為環保出一分力，「有啲嘢真係需要嘅時候，不如諗吓借先，唔使下下都買新」。
記者：Carmen C.
攝影記者：CWL
「借嘢」於2021年創立，由東華三院贊助營運。主理「借嘢」平台、東華三院計劃經理（服務發展）羅秀英（Karen）接受《Yahoo 新聞》指，成立之初在社交平台招募不同用品，「睇吓有無人真係有呢啲閒置物品、唔想放喺度浪費地方，就可以捐過嚟，亦都鼓勵大家可以共享」。
現時「借嘢」逾 2500 名會員，共有逾 560 件物品供借用。部份物品屬「應急類」，如搬運用手推車、板車；維修用電鑽、鎚仔等等，甚至求婚用的「Marry Me」燈箱、結婚「斟茶」的茶具等，「呢啲其實用幾下好快就用完，好適合大家去借」；每逢入秋，露營用品則較受歡迎；另不少產品屬中型家電，包括焗爐、韓燒爐、氣炸鍋、榨汁機、攪拌機等。Karen 指，有街坊購買雪櫃時以百多元加購榨汁機，看似超值但最終閒置多時，最終捐出搾汁機，「包裝都無拆咁捐嚟畀我哋，不如唔好嘥，畀有需要嘅朋友仔用」。
Karen 續指，現時「借嘢」產品逐漸多樣化，「我哋有瑜珈蓆借，試過有幾個人一齊去上堂，就嚟一人借一張」。亦有學生要參加影片比賽，來借用打燈裝置；若遇上借用率不太高的物品，「借嘢」亦會揀選出來，轉贈予有需要人士。有媽媽則借滾軸溜冰鞋予兒子學習，發掘到兒子這方面的天份，後來平台再獲捐贈滾軸溜冰鞋，亦轉贈予這對母子，「呢度嘅存在原來係攝到啲罅隙，幫到唔同嘅人，同埋佢哋都識用返呢度嘅資源嚟幫返佢哋自己」。
蝸居居民借焗爐嘗入廚樂
共享平台落戶大角咀，最初與附近的居住環境有關，有不少劏房及細單位，「可能想焗個蛋糕，都無辦法長時間擺個焗爐喺屋企」，故希望「借嘢」成為居民的另類「會所」，「落嚟借返去，用完擺返落嚟，唔需要阻到屋企原有空間，但佢仍然享受到做呢啲嘢嘅過程」。Karen亦強調，捐物者不一定富裕，「好多基層朋友都有捐，例如小朋友玩嘅玩具，小朋友大咗唔再玩，都會捐出嚟畀其他人」。
記者在「借嘢」門市查看，發現連單鏡反光相機、長焦鏡頭等較為昂費的物品亦供街坊借用，Karen 重申，街坊借用所有物品均不收費，亦不會收取訂金。「我哋都想畀大家知，我哋對大家嘅信任好大，唔係存住啲唔好嘅念頭嚟借嘢，唔想用金錢或者會員級別框住大家」。可幸街坊亦相當「聽話」，至今未有物品被破壞，「街坊就算有時遲咗還，都會同我哋講唔好意思」。
雖然平台位於大角咀，亦非鄰近港鐵站，但不止大角咀和油尖旺街坊，也有沙田、元朗居民來借物，Karen 指有大澳居民曾借用兒童滑板車，「佢哋本身有一架，但有朋友帶住小朋友去大澳玩，借多架就可以兩個小朋友一齊玩」。
「借嘢」的物品除了捐贈得來，亦有部份屬「期間限定」。若物主不想永久捐出物品，但又希望在物品閒置期間借予街坊使用，亦可登記於特定時間借出物品，「啲嘢可能唔止一個人合用，可能係兩三個人甚至更多，咁件物品就可以喺社區上面流轉」。Karen 形容，街坊「有借有還」，亦是信任的建立，「用唔同嘅渠道去連接返街坊嘅交流」。
Karen 續指，借物的過程中，平台職員會與街坊傾談，了解其背景及需要，提升鄰里之間連結，「我哋之後都搞過啲活動，好似整家事皂咁，啲活動點樣誕生？就係識到街坊、知道佢哋有咩技能，再邀請佢同大家分享。」營運兩年，現時「借嘢」已發展出自家義工隊，連繫街坊小店舉辦活動，包括不同工作坊及環保維修日。去年十月底就舉辦萬聖節「攞糖活動」，40 多間小店參加，「唔少街坊話大角咀好耐無咁熱鬧」，亦令她們甚為安慰。
設自助派物機供街坊領取日用品
近期「借嘢」推出日用品援助計劃，徵收街坊閒置的日用品如洗潔精、沐浴露、洗衣液等，其他街坊經申請可每月經深水埗及油尖旺區的自助派物機，憑八達通免費領取日用品，為期一年。另外，「借嘢」亦與信和集團及順豐速運合作，推出「借嘢」智能櫃服務，借用物品可在位於奧海城的「借嘢」智能櫃自取，運費全免，希望進一步善用社區資源，實踐可持續發展。
Jie Yeah 借嘢
電話：9661 9466
地址：大角咀菩提街1號地下1B
網址：https://www.facebook.com/profile.php?id=100083371808929
「借嘢」借物程序：
下載手機應用程式登記成為會員，或透過 Google 表格登記成為會員
揀選所需借用品
職員拍照紀錄及安排交還日期，每次可借三項物品，借用期為十天
若需續借，需於限期前三日提出以便安排，限續借一次
將物品清潔乾淨再交還
捐物程序：
1. 拍攝物品照片，WhatsApp 至 9661 9466
2. 待職員跟進了解物品狀況
3. 當若物品被確認可以捐出，清潔乾淨後便可交至「借嘢」，亦可自付郵費速遞至「借嘢」大角咀店
接收物品種類：維修工具、運動用品、戶外用品、家居用品、家用電器、音樂樂器、玩具等
