做一世朋友要幾錢？40年至少要花24萬港元

朋友，我當你一世朋友～成世人流流長，總有幾個最佳損友。但原來要做一世朋友，比起一般朋友，要付出唔少金錢。

根據英國TopCashback網站調查，如果要做40年朋友，至少要花23,870英鎊（約242,239港元）。點解要咁多？因為你首先要花4,679英鎊（約47,543港元）同佢慶祝生日，如果好朋友失戀，你又要花168英鎊（約1,707港元）陪佢。去旅行亦都要用242 英鎊（約2,459港元）買手信畀佢，然後又要用127英鎊（約1,290港元）幫佢搬屋。

如果佢結婚，要花431英鎊（約4,379港元）做人情同幫佢搞單身Party。當佢有埋小朋友，你可能做埋乾媽乾爹，咁又會額外用多283英鎊（約2,876港元）喺好友啲小朋友身上。而且，人越大，工作、生活環境會唔同，有時甚至要飛去第二個國家探佢，為咗維繫友誼而攀山涉水見大家，又要花17,940英鎊（約182,289港元）。

而54%英國人話會有3個好朋友，要維繫友誼一世就好可能至少要付出71,610英鎊（約727,630港元）。好似畀好多錢咁，唔知大家又覺唔覺得貴？85%受訪者就話完全值得畀咁多，因為友誼係無價架！

梗係啦，日日咁辛苦返工搵錢為咩？為嘅咪又係可以同吓屋企人去旅行，得閒同死黨周圍Fing吓食吓飯傾下計，如果有錢但無人同你分享又有咩意思？

雖然嗰幾個死仔，見你仆親一定第一時間恥笑你先，但你有事都係第一個仆出嚟幫你。一齊癲過，見過你最頹廢個樣，亦都見過你最白痴嘅樣。買幾貴嘅禮物送畀佢都好，見到佢開心，一千幾百猶如垃圾啦。