傳MIRROR十二子分拆AB隊 AL點名飛起姜濤？ 花姐否認 AL黑底IG回應

人氣男團MIRROR成軍5周年，除咗推出新團歌《Catch A Vibe》及前往澳洲拍攝團綜之外，仲有喺迪士尼舉行見面會及明年1月舉行個唱補場，搞作多多。不過最新竟然傳出MIRROR喺舉行個唱補場後將減少團體合作，改以主攻單飛。另外，報道亦指MIRROR經理人花姐（黃慧君）喺7月已經向Viu辭職，並被Anson Lo「私有化」，自掏腰包出錢聘請花姐專責其演藝事務。

正所謂「人多自然是非多」，MIRROR有12位成員難免有「小圈子」，報道指花姐被Anson Lo「私有化」後，原經理人部門計劃將MIRROR分拆做AB隊，更由Anson Lo親自點名，姜濤更被兄弟AL飛起，以AL為首嘅隊伍，隊友名單為Edan、Jer、Jeremy、Stanley及Frankie。根據報導指有知情人士透露MIRROR有上下弦，而內部亦有大仔組及細仔組，而AL同姜濤係屬於細仔組，不過AM team改組後，AL將姜濤換咗Frankie。姜濤一直視AL為好兄弟，所以佢知道消息後好傷心。

報道仲話MIRROR經理人花姐喺7月已經向Viu辭職，並交由新入主經理人部門嘅Letitia接手，MIRROR新經理人Letitia係曾經擔任余文樂及Supper Moment嘅藝人管理，最新工作嘅主力就係姜濤。

對於花姐被AL私有化一事，花姐以短訊回覆傳媒否認，指自己係Makerville員工，而家專心做MIRROR演唱會，自己係負責MIRROR演唱會，唔係淨係負責Anson Lo。另外，花姐亦有喺IG出Story否認傳聞：「無聊！講到真嘅一樣，又有人信係真」。

Anson Lo稍早時間亦喺IG發限時動態回應，指雖然網上有唔少假新聞及謠言，而自己會繼續保持良知努力生活。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！