內地奮戰9個月 王君馨唔慣Single趕慰夫

王君馨在內地工作不斷,搵「人仔」之餘亦賺了不少經驗。
王君馨在內地工作不斷,搵「人仔」之餘亦賺了不少經驗。

藝人王君馨離開娘家無綫後,發力在內地打拚,既做綜藝節目,又拍電影及廣告,工作不斷。她表示最不習慣是老公不在身邊,預告10月便會「慰夫」。

王君馨(Grace)日前找來好友徐偉棟為她影了一輯靚相,她穿上鮮紅色雪紡裙大擺甫士騷長腿,意態撩人。身在橫店拍攝甄子丹監製及主演電影《天龍八部之喬峰傳》的她,與戲中演員合作愉快,她說:「拍呢套電影好開心,係一個好好嘅經驗,仲有幾日就煞科喇!我最重要嗰場戲都未拍,希望到時可以表現好啲啦!」

返港搞新歌

拍畢《天》片後,Grace會先到上海拍廣告,之後便返美國紐約:「我已經4年冇見屋企人喇!會同老公一齊返去,10月尾就返香港,到時會搞自己嘅新歌,所以嚟緊有好多嘢忙!」在內地打拚9個月的她,工作方面相當充實,但問到有甚麼地方覺得不習慣?她說:「最難適應係冇老公喺身邊,但呢段時間真係學咗好多嘢,可能之前喺無綫太耐,呢度令我過得好充實。」

她在內地跳舞真人騷《了不起舞社》表現出色,有單位透過其內地經理人邀她唱一首帶有90年代感覺的歌曲《別把我對你的愛當作卑微》,此曲帶點港風Disco風格,她更找來好友、木村拓哉同門師弟羽生田拳武(Amu)拍MV,齊齊在懷舊酒吧起舞。

王君馨在MV大跳懷舊舞,重拾Disco風。
王君馨在MV大跳懷舊舞,重拾Disco風。