雅虎香港新聞 【全民造星】率先預測10強，姜濤、Lokman、肥仔齊齊晉級
ViuTV全港首個大型選秀節目《Good Night Show 全民造星》已經去到如火如荼嘅階段，節目自播出以黎都大受觀眾歡迎。除咗有得睇型男鮮肉之外，mean爆花姐同一班星級導師都成為咗網上熱話；而一眾參加者當中，姜濤、Lokman同肥仔更加變成網上人氣王，擄奪咗唔少妹妹仔嘅心。雖然觀眾透過電視依然係睇緊20強，但原來《全民造星》嘅10強一早已經誕生，更飛到美國洛杉磯進行特訓。近日喺網上就流傳《全民造星》嘅10強名單，等我哋一齊黎睇下你嘅心水又有冇入圍啦！（至於有幾多成真，就等你哋自己定奪喇！）
有「嫩版彭于晏」之稱嘅姜濤由節目播出之後已經大受關注，除咗係因為佢由200磅肥仔減到變成依家花美男嘅振奮人心勵志故事之外，佢嘅顏值同實力都係云云參賽者之中高。佢可愛萌爆嘅神態更加成功幫佢擄奪咗一班「姜糖」嘅心。千祈唔好以為「姜B」得個樣，其實佢唱功都好勁，曾經參加過內地嘅歌唱節目《快樂男聲》，仲去到30強。近日網上面更加有傳聞話3間唱片公司都想簽佢做旗下藝人，唔知又係唔係真呢？
肥仔吸睛嘅地方除咗係因為佢擁有圓咕碌嘅身形之外，仲俾人話極似《男兒當入樽》入面嘅安西教練。望真啲......又真係幾似喎！唔好睇佢肥嘟嘟咁，其實作為dancer嘅佢身手相當靈活，更加喺不同嘅跳舞環節表演當中一個carry全隊！唔單止跳得，唱歌飆高音一樣冇問題，加上佢超級照顧組員嘅性格，所以深得一班評判、星級導師、甚至網民嘅喜愛！
大家應該會覺得Lokman好熟面口，因為佢曾經登上大銀幕，主演熱血電影《狂舞派》！雖然節目中有唔少出色嘅dancer，但Lokman嘅實力都算係數一數二，節目入面嘅排舞同排位都經常會搵佢幫手。同肥仔一樣，佢喺組入面都係擔當住一個carry全家嘅角色。
有高度又有肌肉嘅Stanley其實一路以嚟都係大熱，除咗擁有令男人女人都流哂口水嘅身形之外，喺40強嘅淘汰賽當中，評判之一嘅蕭定一更加話「我印象最深嘅係Stanley個胸肌。」除咗外在條件，Stanley嘅跳舞嘅實力其實都無可置疑，喺組入面都充當住隊長嘅角色，幫手諗舞步又幫手排舞，親力親為，為表演出盡全力。 唔知Stanley 40吋嘅胸肌又係咪真係可以帶佢入10強呢？
以5盞藍燈成功入圍第一圈嘅Anson都係dancer出身，唱歌跳舞都掂嘅Anson更加係心美bb嘅愛將，每一次表演嘅時候，心美bb都會係backstage為佢打氣。Anson曾經講過佢嚟參加呢個比賽既原因就係因為唔想再淨係企喺明星後面，都想有一日可以做企係前面嗰個，呢一股熱血又真係幾charm嘅！唔知有心美bb呢個粉絲支持住，佢又係咪真係成功入到10強呢？
同樣擁有大批fans嘅龍志權係無記電視《毛記電視》嘅偽員，所以久唔久都會係網上平台見到佢玩嘢搞笑嘅短片。青靚白淨嘅佢於節目開頭喺《Eye Catching Idol》嘅投票中勝出可以直入決賽，但隨著《全民造星》繼續播出，呢股龍志權熱潮似乎有每況越下嘅跡象，唔知又可唔可以晉身10強呢？
以天然呆跑出嘅Ian唔止得個呆樣，其實仲有一把靚聲。喺40強淘汰賽當中更加被盧凱彤大讚，並要求要佢清唱一段嚟聽下，然後大讚「我聽到我要聽嘅嘢。」唔好睇Ian傻下傻下咁，但其實好多人都係佢嘅頭號粉絲，就連mean爆嘅花姐透氣佢嘅fans！
同樣都係唱得之人，細貓有一把好獨特嘅聲音，評判曾經話過佢唱歌有一種蘇打綠青峰嘅感覺。一頭銀白色頭髮加上情趣舒服嘅歌聲，唔知又幫唔幫到佢進入10強呢？
應該係少數走韓風嘅參加者，其實一開頭啲評判都唔係咁like佢架，因為覺得韓風偶像喺香港娛樂圈未必行得通。至於才藝呢，其實都唔差，唱歌跳舞都唔錯，學習嘅態度更加受到星級導師嘅讚賞，唔知有係咪真係入到10強呢？
都係小鮮肉之一嘅Edan，除咗外形樣貌受到關注之外，佢嘅反白眼都同樣受到關注。事關係比賽初期，Edan自彈自唱期間投入到反白眼成為咗網民熱話。唔知憑住唱得同迷人嘅反白眼可唔可以帶佢入到10強呢？
前往瀏覽完整內容:
【全民造星】率先預測10強，姜濤、Lokman、肥仔齊齊晉級
更多相關報導:
