全民造星4丨30強名單誕生 梁祖堯淘汰執生王Sica保方方捱轟 網民：ViuTV最黑暗的一天

ViuTV《全民造星IV》噚晚（7日）播出40強最後一組決賽，由A1組以指定歌曲：鄭欣宜《救命歌》對戰B2組，A1組表演贏得一眾評判讚賞，B2組扮成師奶以黑色喜劇方式演繹逗得全場大笑，連吳雨霏（Kary）都話充滿共鳴，但始終不敵A1組，阿Mic即時出局；連同之前5個回合對戰，由導師許廷鏗帶領嘅A組贏咗3場，根據賽制，梁祖堯帶領嘅B組要額外淘汰多5名成員，最終Liu哥、Ana、阿杰、潔滢及Sica被淘汰，30強名單正式誕生。

節目播畢，網民對淘汰名單甚有意見，尤其見到之前連累隊友嘅方方、35歲老將芯駖都仲係到，但執生王Sica竟然被淘汰感到憤怒，事關近期演出中，Sica都愈見進步，尤其係之前B4組演繹叻女版《Come on, Bad Boy！》時，網民都大讚欣賞Sica舞台執生能力，又指佢有好多可能性，值得擁有女團，就連花姐都有讚過Sica叻女。Sica被淘汰後，網民紛紛係社交平台留言戥Sica唔抵：「ViuTV最黑暗的一天」、「想話畀Viutv知，其實foul走sica同foul走Marf效果唔會爭好遠」、「呢啲難得一遇嘅女團奇材佢都foul，我都唔知可以講咩好」、「喺96個女仔入面根本唔會搵到第2個女仔replace到佢（Sica），佢係獨特而且係香港好少見到嘅類型」、「方方失準唔記得連戲用阿婆聲唱，比評判批評，你留；Sica失準神執生比評判大讚仲要贏埋，你foul。梁祖堯你真係得」等等。

網民對梁祖堯決定感到無奈，但Sica就喺社交平台撰文感謝粉絲及梁祖堯：「你真係一個好有心嘅導師，一個心地好好嘅人。節目剪出嚟嘅時間同內容有限，但你為我哋付出嘅時間同心機遠超於大家嘅想像。你幾乎每一晚都陪我哋留到好夜，幫我哋安排好多好有意義嘅exercise，每一輪都逐個女仔比一個方向我哋去成長突破。」Sica提到數唔曬梁祖堯付出過嘅嘢，因為好多位好無條件咁為佢哋付出，亦指自己好好彩可以入到B組，最後Sica希望網民唔好攻撃留低嘅人：「我真係有不足嘅地方㗎！始終十個名額真係好有限，其他入咗去嘅人都好好，佢哋都好值得繼續行落去㗎，加上嗰陣時都冇灰心太耐，好快振作返了！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！