全民造星4｜女團後日正式出道 出道歌叫《Hold Your Breath》？網民：期待屬於香港嘅新女團

ViuTV選秀真人騷《全民造星IV》總決賽於聖誕夜圓滿舉行，結果由邱彥筒（Marf）、沈貞巧（Gao）及Day（許軼）奪得冠亞季軍，可以直接加入女團出道。至於女團人數、成員及名稱方面，ViuTV將於後日（12日）下午6時半舉行出道記者會時公開。去到今日，ViuTV官方社交網站上載最新宣傳照及片段，並以「HOLD YOUR BREATH」為口號。

早前女團經理人Wing曾表示女團人數將會喺10人之內，現時暫考慮組成8人女團，除咗優先考慮20強選手之外，Wing表示亦會考慮其他被淘汰嘅參賽者。而早前有網民發現ViuTV註冊COLLAR商標，及有8人疑似初步名單流出，分別係Marf、Gao、Day、Ivy So、WINKA、芯駖、So Ching及Candy，唔少網民都對女團誕生非常期待。

去到今日，ViuTV公布女團最新消息，於官方社交網站上載最新宣傳照及片段，並以「HOLD YOUR BREATH」為口號，出PO留言話：「[ HOLD YOUR BREATH ] Debut Stage 01.12 > 18:30 耀眼新星即將劃破星空 邀請您一同迎接這一道亮麗光芒 ViuTV | MOOV | KKBOX | JOOX 同步Facebook直播 #holdyourbreath @moov_music @kkbox_hk @joox_hk」。

雖然暫時仲未知女團人數及成員名單，不過一班網民已經非常興奮及期待。唔少網民都相信女團嘅出道歌叫《Hold Your Breath》，紛紛留言表示支持，例如「Hold your breath 似係第一首歌歌名」、「咁刺激公佈即出道」、「係咪有埋新歌派？」、「一眾“前夫”準備報仇xd」、「女團世一，支持」、「準備入第二個婚姻破裂page」、「唔理女團有邊d人，一定支持」、「期待屬於香港嘅新女團！」、「直接抽擊CCTVB & after class」、「期待咗好耐喇…」、「女團終於要來了! 萬分期待中! 但也希望VIUTV好好照顧其他落選者.」及「好期待呀!!!!!」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！