全民造星4｜網民指評判評語冇營養 狠批朱栢康：有理由相信呃show錢

ViuTV選秀節目《全民造星IV》已播映一星期，96強一對一淘汰賽中已有唔少賽前大熱被Foul，例如曾參加過《全民造星III》嘅鄭嘉欣（Christine）及歐陽巧瑩胞妹Bubu都要跌入復活區。除咗許軼（Day）成觀眾討論對象，首輪淘汰賽三位評判團：DJ當奴、朱栢康及鄭融都係話題之一，不過就唔係讚佢哋，而係批評佢哋做得唔專業。

上屆《全民造星III》，評判之一卓韻芝一句「唔好啦」加埋張厭世咀臉被製成Meme圖瘋傳兼做埋萬能Key，充滿娛樂性，但觀眾就話《全民造星IV》評判團相當無聊，唔夠「快狠準」：「今屆嘅評判真係極之非常冇火花、悶、評語無營養。」、「下round換走三個評判啦，唔該，尤其朱栢康鄭融」、「參賽者差，評判差，差差差。」等等。

有網民認為當奴畀嘅評語講咗等於冇講，又指佢講嘢好悶；鄭融除咗首集爆喊攬住子涓都冇太大發圍，似有冇佢呢個評判都冇咩所謂咁；而朱栢康就被網民指唔知喺到做緊咩，每次撳燈都好似有選擇困難症咁，仲係到講埋晒「人生好難」等無謂說話，紛紛留言指佢唔岩做評判：「有理由相信朱栢康係呃show錢嘅，集集講嘅野、表情、身體動作都一樣。」、「朱栢康先係問題......打天下果陣做得幾好睇，依家做評判唔洗下下搶鏡，D反應仲勁OVER。」等等。不過網民就話好在有主持人強尼喺抽比賽對手嗰陣配對「強對強」「弱對弱」組合，製造吓緊張氣氛，令場面冇咁悶。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！