全民造星5︳企中間位受注目 99號KC黃家灝會係下一個姜濤提早彈出？

ViuTV《全民造星5》今晚播出，一如以往會搵99位參加者展開角逐，亦一如以往會有人退出，於是最終有94人出戰。第一輯《全民造星》冠軍姜濤參賽號碼係99號，當時未播出已經被傳媒注目。至於上屆冠軍Marf（邱彥筒）更加係一早就被花姐大讚，似乎即使節目未播，熱門人選一早現身。而《造星5》主題曲MV入面，99號KC黃家灝有最多個人鏡頭，連出席記者會都喺九十幾人入面脫穎而出企C位，似乎可以睇高一線。

KC今年25歲，同唔少《造星》參加者一樣都係舞蹈員／跳舞導師／排舞師出身，曾經為MIRROR成員Anson Lo盧瀚霆嘅Megahit MV演出。KC跳舞之餘亦都會排舞，甚至為由《造星2》冠軍吳啟洋（Phoebus）、歐鎮灝（George）及葉振弘（Marco）組成嘅男子組合P1X3L排舞。KC仲幫許廷鏗上年嘅演唱會擔任舞蹈編排。至於佢女友就係《造星4》五強人馬Win Win（楊安妮）。KC 同Win Win唔止一齊跳舞，仲曾經一齊經營youtube頻道創作短片。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！