全民造星5︳十強名單流出 KC黃家灝 Nathan魏念恩 王鋒大熱入圍

ViuTV嘅《全民造星V》今個禮拜先開始播出第二回合紅藍兩組對決，但係已經有媒體流出終極十強人選！

據知，今屆3大熱門99號KC黃家灝、2號Nathan魏念恩同1號王鋒全部入圍十強。而節目出街後演出令觀眾眼前一亮嘅Rapper Taco(黃泓祖)、來自美國嘅拉丁舞老師Lyman（香胤宅）、歌聲滄桑嘅大隻仔亨仔（陳鎮亨）都成功入圍。

其餘4位十強份子係35號跳舞老師Tsoul(田曜誠）、46號希晉（王希晉），而台灣代表3號Snoopy（詹仕偉）及大馬代表52號Ash(盧信宥)都打入十強。如果名單屬實，由陳蕾同陳健安帶領嘅紅組會有6人入圍，而馮允謙及韋羅莎做導師嘅藍組就有4人入圍。

節目播出後，表演不俗又得評判歡心嘅49號Adams，同埋被視為「姜濤2.0」嘅96號樂庭，都無緣十強。而日前播出嗰集甩舞嘅阿O、觀眾緣麻麻嘅「重讀生」Moley都入唔到決賽，可能令部份觀眾「放心食用」餘下節目。

《全民造星》向來都係先錄後播，因此之前都試過決賽名單提早流出。當年《全民造星3》播出爭入十強環節前，十強名單早已曝光，更爆出一路表現欠佳嘅CY（陳澤言，後用回原名陳宗澤）晉身決賽，令唔少網民質疑「名單」真確性，但結果一如所料CY以令人驚艷嘅演出突圍。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！