全民造星5︳唔再係監製 花姐眼濕濕︰呢個節目已經對我無意義

《全民造星5》尋晚首播，第一集先介紹幕後班底同製作過程，好似有MIRROR正副隊長Lokman（楊樂文）同AK（江𤒹生）去加拿大、ERROR正副隊長肥仔（梁業）同阿Dee（何啟華）去馬來西亞搵參賽者嘅過程，以及介紹4位導師陳蕾、陳健安（On仔）、馮允謙同韋羅莎等。

不過最好睇都係一手創造《全民造星》嘅花姐（黃慧君）出鏡，畢竟去年MIRROR演唱會事故後，幾乎冇再好似以前咁喺公開場合講嘢，甚至連社交平台都好少更新。

今輯花姐唔再係監製，而係以總顧問身份參與，面試、排舞、同導師開會都會有佢份。睇「花姐鬧人」係《造星》其中一個賣點，尋晚佢就直指馮允謙唔係一個有趣嘅人；佢睇完參加者為主題曲《前傳》排舞時，直斥班仔跳得核突，「你地上到節目都係會被人恥笑，點樣參加完round 1而唔被人foul？」，甚至話今年參加者質素比往年差。

鬧人之外都有感性位，花姐對於唔再係《全民造星》監製時﹐佢話「呢個節目已經對我無意義」。花姐回想起歷年《造星》都有好大感觸。「《造星1》對我人生好大轉變，因為嗰個係第一個監製節目，所以自己好投入，我覺得個節目好好睇，跟住創造咗MIRROR同ERROR。去到《造星2》開始，因為我已經轉咗身份，可能嗰刻我為咗做個節目，都係為緊MIRROR。去到《造星3》，我係話『做咩呢？係為咗咩呢？』。《造星4》係為咗COLLAR？其實我又真係唔係好投入到。呢個節目對我嚟講已經係……唔知呢？」。

2018年，再次做電視台嘅花姐向高層sell橋成功，成為《全民造星》監製，成功為ViuTV打出漂亮一仗，仲促成MIRROR同ERROR嘅誕生。之後花姐成為兩隊男團嘅經理人，但繼續為《全民造星》第2－4季出任監製。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！