全民造星5︳寄養家庭成長 母親患癌 大熱魏念恩Nathan出場 自揭辛酸身世

《全民造星5》進入第2周，繼續播出第一輪初選情況。其中賽事大熱之一、未出道就有fans嘅2號魏念恩（Nathan）喺尋晚出場。上星期有傳Nathan女友墮樓身亡，至今佢仍然未有回應，但IG頭像轉成黑色。網上有傳Nathan會退賽，但節目組仍然播出其參賽片段。

Nathan喺節目中透露身世，原來佢自細喺單親家庭長大，細個就因為覺得讀書唔重要而經常逃學，因此令社工界入，認為Nathan媽媽無法照顧個仔。Nathan由11歲開始，就由唔同嘅寄養家庭照顧，令佢覺得自己好似個箱咁成日被人調來調去。好在後來去到一間基督教宿舍，Nathan對音樂產生興趣，亦開始讀返書。

雖然Nathan成長過程中要同媽媽分開生活，但母子關係好緊密，只係因為好多因素而無法好好表達。Nathan試過喺寄養家庭逃走，都係為咗搵媽媽。不過節目組叫Nathan回想同媽媽最開心嘅畫面時，Nathan即刻喊出嚟，因為媽媽患癌住院，無法帶佢去旅行，令佢認為自己未能盡做仔嘅責任。Nathan參加《造星》係希望以音樂去治癒同媽媽有相同經歷嘅人，而佢自彈自唱《下一束光》嘅演出獲得3盞燈，並加入陳蕾同陳健安做導師嘅紅組。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！