全民造星5｜「翻版Dee哥」98號Aaron憑口才扭轉劣勢晉級 網民：果然唱歌唔係主菜

ViuTV選秀節目《全民造星V》播映第2周，一共有6位參賽者登場，分別係15號宇軒、98號Aaron、9號Lyman Heung、45號Adam Sang、22號衡仔及56號MK，當中Aaron、Lyman、Adam可以晉級，宇軒及MK則跌入復活區，而衡仔就被即時淘汰。

如果要講噚晚最令人留下深刻印象嘅參賽者一定係現年30歲嘅98號「翻版Dee哥」Aaron（梁浩朗），任職大律師嘅佢因外貌好似ERROR成員何啟華（Dee）而備受網民關注。喺首輪面試時，音樂監製MC就問佢有咩因素驅使會參加《造星》，而Aaron就話自己好欣賞韓國演員孔劉，而孔劉參演講述校長性侵聾啞學校學生嘅電影《熔爐》，電影上映後引起極大迴響，所以Aaron希望自己利用影響力去為社會作出正面嘅改變。不過口才了得嘅佢，喺面試時被忠告「比多啲真誠，收起小聰明」。

Aaron以一身西裝打扮，官仔骨骨出場，選擇唱出《預言書》作為表演項目，期間仲戴上喺公事包拎住嘅紅色小丑鼻，不過導師及評判都唔明白表演嘅意思，表演完成後都未有評判撳藍燈。身為大律師嘅Aaron就滔滔不絕咁講表演嘅背後含意，其實呢個表演係佢自己嘅故事，Aaron喺細個嘅時候「我的志願」係想成為一位小丑去表演，等世界可以多啲歡樂，不過就被老師話做小丑冇用，要做醫生同律師先有用，而長大後佢真係成為老師口中嘅「律師」，不過佢就話冇忘記自己想表演嘅意向。之後，評判陳詠燊及伍詠薇先後撳藍燈，令Aaron成功自辯晉身60強，進入Rosa及Jay Fung嘅藍組。不過正版Dee哥睇完佢嘅表演就話：「係有啲嘢睇嘅、係有啲才華嘅（喺講嘢個part），但係你話以節目角度呢，我真係唔睇好佢行得遠，因為始終嗰樣嘢係會不斷挑戰緊佢一啲唔擅長嘅嘢。」

節目出街後，唔少網民都紛紛留言指Aaron同阿Dee好似樣，例如「error撈唔掂 der gor要再參賽」、「dee 2.0」、「真係好似」、「餅印咁」、「講野都好似」、「佢把聲都有少少似Deegor「其實係咪失散兄弟」、「啲面部表情都好似阿Dee」、「真係好似Deeee」、「整番個3姊弟旅行團節目啦」及「想睇Dee同Dee姐同Dee2.0做節目」等等。另外，唔少網民都指佢唱歌麻麻不過辯論真係好犀利，例如「佢講野好有條理」、「重點係後面辯論」、「果然唱歌唔係主菜」、「Touching 但唱歌好難聽」及「講到兩盞燈返嚟又真係幾勁」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！