全民造星5｜大熱1號王鋒落力勁舞全取7盞燈 陳蕾搶人又失敗嬲到要重睇慢鏡

ViuTV《全民造星V》噚晚（18日）最新一集，繼續都係94位參賽者競逐60強位置；一共有7位參賽者登場，分別係7號Aaron Bosco、93號EX、16號Sam Lam、1號王鋒、64號Alex Regis、18號Owen Lai及27號嘅David Cheng，當中Aaron Bosco、Sam Lam、王鋒及Owen Lai可以晉級，其餘三人則跌入復活區，暫時仲未有人被即時淘汰。

喺噚晚嗰集，有四位參賽者成功晉級，嚟自大馬嘅Aaron Bosco一早已經出道，雖然有演出機會，不過星運平平，最後更退居幕後做剪接師，今次佢憑自彈自唱《初戀》獲兩盞藍燈，順利進入藍組。而被指貌似古巨基嘅Sam Lam以自彈自唱《時候不早》作為表演項目，同樣獲兩盞藍燈進入紅組。嚟自北美嘅Owen Lai年僅18歲，唱出《Can’t Take My Eyes Off You》獲兩盞藍燈順利進入紅組。

不過要講到噚晚嗰集嘅焦點就係王鋒，擅長跳Locking嘅王鋒喺節目未出街之前，已經係主題曲企喺中心C位嘅其中一位參賽者，更被指係大熱人選之一。佢噚晚以一身迷彩war game裝出場，並瞓身表演Locking，結果獲得評判一致好評獲得三盞藍燈，當中伍詠薇仲話佢已經完全準備好晒，兩組導師都以秒速撳燈，最終韋羅莎及馮允謙較快，王鋒成功進入藍組。事後陳蕾同On仔由於在此搶人失敗，結果嬲到要去錄影廠檢查啲燈及重睇慢鏡，結果真係證實係陳蕾撳燈速度唔夠快。

節目出街後，唔少網民都讚王鋒表演不俗，例如「副計唔錯」、「幾好笑容」、「好有energy」、「男版GAO」、「樣一般 但舞真係ok 都係時候入返啲跳舞嘅」、「好睇」、「真係炸爛左個舞台」、「精彩！」、「呢個王鋒真不得了！充滿活力,眼神殺人,跳鎖舞有劇情,力度,又駕馭咁難舞步,仲兼顧同評判,觀眾互動。」及「見到王鋒舞姿真係即刻諗起Lokman同阿餃」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！