全民造星5｜38號天宇不滿被滅燈 深深不忿鬧爆Edward：我講普通話一定多過佢講白話

ViuTV選秀節目《全民造星V》播映第3周，噚晚（1日）仍然繼續係94位參賽者競逐60強位置；一共有8位參賽者登場，分別係80號Thaddeus、40號Jackson、39號Eddie、77號Patrick、38號天宇、58號Lubia及62號Cotton及86號Cho Lewis，當中只有Thaddeus成功晉級，Jackson、Eddie、天宇、Lubia及Cotton則跌入復活區，而Patrick就被即時淘汰，至於Cho Lewis嘅表演就將於今晚登場。

噚晚，評判Edward Chan竟然再一次出手「滅燈」，令原本成功晉身60強嘅38號王天宇（天宇）送入復活區。平時有唱開Busking嘅天宇，IG粉絲人數超過一萬人，連花姐喺面試都好奇問佢係唔係好出名，佢喺面試時表演自彈自唱MC嘅《記憶棉》順利入圍。不過佢喺入圍後屢次遲到及缺席，例如MV排舞日缺席佢就話自己唔舒服，喺屋企休息及瞓覺，不過就被工作人員踢爆：「有人見到你喺旺角 busking」，之後佢就話「朝早醒唔到，夜晚走出咗去。我唔係busking ，我去食咗個飯，我係見過唱咗一、兩首歌。」 去到綵排時，每一位參賽者只有一分半鐘時間，不過佢就自行加時，搞到即時焫着CM及耀Sir。

天宇以自彈自唱《畢竟深愛過》作為表演項目，監製及幕後工作人員更表示佢「好難搞」，表演令天宇獲得兩盞藍燈，但導師們都未有撳燈，因不感興趣及覺得好難教。而評判Edward Chan喺呢個時候就要求佢清唱，可惜佢未能達標，結果Edward收回藍燈，令佢又晉身60強變喺復活區等待後補位置。

深深不忿嘅天宇，事後表示非常不滿：「啱啱兩盞燈佢叫我唱多次，我以為佢唔會撳㗎喎，我都接照佢要求，我變埋唱腔咁唱，佢都照撳熄我盞燈。我無嘢好講，我好嬲，憤怒嘅。我唔覺我咬字係有問題，因為普通話、國語係我母語嚟嘅，我講普通話一定多過佢講白話。有咩問題呀咬字方面，佢可以話我唱腔係有啲問題，但係我真係唔覺得我咬字有問題，因為每一個字讀出嚟係清楚。好老實講係好燥底嘅，可能我唱歌唔啱你所願，你覺得好難聽，唔係以一個咬字唔清楚輕易將一個人foul咗去復活區，而且我自問，我實力係唔會差過某啲喺60強入面嘅選手。」

節目出街後，唔少網民紛紛留言認為天宇好有問題，例如「佢其實口齒又不清 個樣又唔X靚仔 又咁X多大話 又打人 又遲到又mk點搞」、「講嘅野根本冇句真 慣性講大話」、「呢條友態度好有問題喎」、「未出名就咁臭串」、「千錯萬錯都係人哋嘅錯正宗垃圾」、「趕走佢啦！佢真係冇mak 大個口唱囉！」、「不接受導師的批評，自以為是，態度好有問題，請退賽！」、「呢條友，目中無人，又不合群，自視過大，不知所謂，底佢一世係街邊賣唱。」、「以為自己好有料 唔該檢討吓自己態度先」、「抵X死，冇咗盞燈」
、「睇到Edward老師熄燈，我竟然不自覺拍手掌」、「真係性格好有問題」及「5季以黎最討厭既參賽者出現了」等等。

另外，節目出街後天宇喺TG群組上載與Edward Chan嘅對話紀錄，向Edward表示自己好後悔及道歉，而Edward亦有回覆話：「Take it easy」，不過事後佢將對話紀錄截圖刪除，原因係網民質疑做騷，及未得Edward同意公開對話內容，當中更不慎泄露其工作室地址。去到今日凌晨，天宇喺IG Story出PO道歉：「對不起，曾經的我是一個不折不扣的壞人，而我將會用餘下嘅時間重新出發。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！