全民造星5｜55號梁賢基Jeffrey係前韓國練習生 仲參加過TVB香港先生選舉

ViuTV選秀節目《全民造星V》播映第2周，噚晚（23日）最新一集，繼續都係94位參賽者競逐60強位置；一共有7位參賽者登場，分別係55號Jeffrey、8號Ethan、24號Ares、76號Hayden、26號阿澤、74號阿生同95號Lucas Ip，當中只有阿生可以晉級，Jeffrey、Ethan、Hayden及阿澤則跌入復活區，而Ares及Lucas就被即時淘汰。

現年27歲嘅北美參賽者55號梁賢基（Jeffrey），曾經係韓國練習生，同韓星PSY合作拍廣告，仲曾喺首爾世界盃體育場5萬名觀眾面前表演之外，原來佢係2016年參加過TVB舉辦嘅《香港先生選舉》，不過當年三甲不入，返回溫哥華。熱愛表演嘅Jeffrey今次轉戰ViuTV《全民造星V》，並係噚晚第一位出場，以跳舞《Rhythm of Passion》作為表演項目，雖然佢出盡全力演出，不過完成表演後仍然係三盞紅燈，仲俾評判Edward指演出欠缺層次感。喺三位評判商量後，陳詠燊就突然撳燈並話：「我做好人啦，次次都係我。」結果令Jeffrey獲得一盞藍燈進入復活區。

節目播出後，唔少網民都認同佢跳得，不過唔識編排表演，留言話：「好似好忙但又唔知睇左乜咁」、「jeffrey最多係唔識編排表演啫 應該有基本質素」、「佢啲effect搞到好眼花」、「值得一盞嘅 但要練下氣」、「肥仔講得咁岩 太full」及「唔知點解睇佢跳好攰」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！