全民造星5｜75號Travis同AK@MIRROR撞樣 連本尊都笑到喊

ViuTV選秀節目《全民造星V》播映第3周，噚晚（29日）最新一集，繼續都係94位參賽者競逐60強位置；一共有7位參賽者登場，分別係3號Snoopy、83號Carson、37號Oscar、31號Andy、52號Ash、75號Travis及81號Jason Loi，當中Snoopy、Carson、Ash及Jason Loi可以晉級，Andy及Travis則跌入復活區，而Oscar就被即時淘汰。

喺上星期，現年30歲嘅98號Aaron，任職大律師嘅佢因外貌好似ERROR成員何啟華（Dee）而備受網民關注。去到噚晚嗰集就有與MIRROR成員江𤒹生（AK）撞樣嘅參賽者出場。75號嘅Travis（王璯中）喺面試時，已經被ERROR成員肥仔及阿Dee直指無論外貌、表情、台風、衣著，甚至髮型及膊頭都同AK好似，更被封為「馬拉AK」。而當AK及Lokman睇Travis嘅面試片段時，更加笑到停唔到，當中AK更笑到喊。不過肥仔就似乎唔多睇好，仲話：「如果將佢個賣點覺得佢似AK嘅話，其實佢好快就會俾人foul，因為一個香港唔需要兩個AK」。

身為創作歌手嘅Travis，喺面試時已經表演自彈自唱，聽到肥仔、阿Dee及節目監製都非常陶醉，大讚佢有實力及好聽。Travis最終表演項目係自彈自唱原創歌《手沖咖啡》，不過因為有小失誤，伍詠薇就認為佢開頭表現得不錯，不過後來可惜越唱越不在狀態，最終得到陳詠燊撳藍燈進入復活區等待後補位置。節目出街後，雖然有唔少網民指AK靚仔啲，不過亦唔少網民都紛紛留言指Travis同AK好似樣，例如「AK嚟嘅」、「笑呢下勁似」、「餅印咁」、「個笑容好似」、「合嘴笑真係好似」及「今屆其實係咪選鏡仔替身」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！